Að ríða baggamuninn

„Þessar stúlkur óðu í sjóinn“ segir í myndatexta á bls. 12 í Mogga í dag. Myndin nær þeim hins vegar aðeins niður undir krika og þar er engan sjó að sjá svo djúpt hafa þær þó ekki vaðið. Hafi neðri hluti ganglima þeirra verið í sjó er spurning hvort þær hafa ekki frekar vaðið í honum heldur en í hann.

Veitingamaður úti á landi tók oft til orða á fundum í sínu samfélagi og sagði iðulega um það sem honum fannst hafa ráða miklu um framvindu mála: „En það sem ríður baggamuninum…“ Hestamaður var hann að vísu blessaður, en fundargestir sáu sjaldnast ástæðu til að tengja viðkomandi mál ferðalögum á hrossum og því síður eitthvað kynferðislegt við baggamuninn.

Kunningi minn breskur sem fór að læra íslensku áttaði sig fljótt á að forsetningar og föll hafa afgerandi áhrif i íslensku máli. Hann stóð í frímínútum frammi á gangi þegar einhver kom þar askvaðandi og spurði hvort nokkur hefði séð hann Guðmund. Já, það hafði minn breski vinur og svaraði af bragði, hjálpsamur eins og ævinlega: „Já, hann fór í klósettið.“ Og varð svo hugsi yfir þeim hlátri sem einlægt svar hans framkallaði.

Það þarf í raun ekki nema örlítið frávik frá eðlilegu, viðurkenndu og hefðbundnu máli til að ríða baggamuninn.

Athugasemdir

[Anna Sigríður Guðmundsdóttir, 19.5.2009 kl. 21:03]

Jafnvægið er mikilvægt. Sorglegt að stór hluti íslendinga vita ekki einu sinna hvað orðið baggamunur þýðir. Hvernig eiga þá útlendingar að vita það?

[corvus corax, 20.5.2009 kl. 06:32]

Sorglegt að stór hluti Íslendinga veit ekkert í sinn haus en er samt tilbúinn til að skrifa athugasemdir um mál sem hann skilur ekki einu sinni sjálfur...

[Ben.Ax. (Benedikt Jóhannes Axelsson), 20.5.2009 kl. 10:57]

Sæll. Þeir, sem voru í sveit sums staðar á landinu fyrir 1950, hafa trúlega riðið baggamuninn sem var í því fólginn að sitja reiðingshest ef baggar voru misþungir og halla sér til þeirrar hliðar sem léttari var svo að ekki hallaðist á.

[Yngvi Högnason, 20.5.2009 kl. 12:54]

Vegna íslenskukunnáttu útlendinga. Danskur maður var með fyrirtæki hér í langan tíma.Eins og var með marga dani þá átti hann í smá erfiðleikum með íslenskuna. Á árshátíð fyrirtækisins eitt sinn, var fólk að taka lagið og tók hann þá til máls og sagði: Nú skulum við vera þjóðleg og syngja;"Stóð mér úti í tunglsljósi".