Gettu betur/gargaðu meira!

Fyrra kvöldið af tveim sem Gettu betur/Gargaðu meira var dengt yfir okkur núna í vikunni entist ég til að hlusta til enda, þrátt fyrir gargið. Hugsið ykkur, það þarf að garga og syngja yfir því að fólkið í liðunum kunni nafnið sitt! Nema hvað ég held mér hafi ekki misheyrst. Í hraðspurningum var spurt hve margar lappir væru á sex hestum og fimm knöpum. Hvorugt liðið hafði þetta rétt og þegar dómarinn (sá karlkyns) fór yfir svörin sem ekki komu finnst mér endilega að hann hafi sagt að sex hestar hefðu 24 lappir sem líklega er alveg rétt, og knaparnir hefðu fimm svo samtals væru þetta 29 lappir. Ég vona að mér hafi misheyrst. Það er svo miklu þægilegra fyrir knapa (og fólk almennt) að hafa tvo fætur hver, og þá hefur þetta safn 11 dýra 34 lappir.

Eða hvað?

Athugasemdir

[Páll (IP-tala skráð) 24.3.2012 kl. 20:30]

Spurningin hljóðaði um hvað sex heilbrigðir hestar og fimm einfættir knapar hefðu samtals marga fætur. Rétt svar er vissulega 24+5=29.

[Sigurður Hreiðar, 24.3.2012 kl. 22:45]

Feginn er ég að mér hefur misheyrst. Það misferst margt í þessum gauragangi sem þarna þykir fínt að viðhafa. Þar fyrir utan: Veit einhver um einfætta knapa?

[Jón Bjarni Steinsson (IP-tala skráð) 25.3.2012 kl. 00:33]

Mikið óskaplega þarf maður að vera leiðinlegur til að kvarta yfir því að ungmenni hafi gaman að því að hvetja sín lið áfram í keppni eins og þessari..

[Sigurður Hreiðar, 25.3.2012 kl. 11:13]

Þarna er enginn að hvetja neinn, hvorki áfram né afturábak, enda veit enginn maður meira en hann veit þó gargað sé á hann. Þarna eru ungmenni bara að njóta þess að tefja fyrir og trufla með gargi sem enginn hlustandi heyrir orðaskil í hvort sem er.