Upp og niður legginn

Stórum hefði mér þótt þetta meiri frétt hefði aumingja maðurinn fallið upp!

Þetta er svolítið álíka eins og þegar fólki er skipað að setjast niður. Eina leiðin til að setjast upp er ef maður er út af liggjandi.

Ég hef líka séð og heyrt talað um að fólk krjúpi niður. Ætli það sé hægt að krjúpa upp?

Í einhverju blaðanna í dag er talað um konu sem refur beit í fótlegginn á. Eða eitthvert dýr, næstum örugglega ekki hvítabjörn. Varla hefur þessi skepna verið með réttu ráði ef hún hefur reynt að glefsa í harðasta hluta fótarins, þ.e. legginn, fótinn framanverðan milli ökla og hnés þar sem á flestu fólki er sosum ekki nema skinnið á beininu. Nær hefði verið að glefsa í kálfann, en svo heitir fóturinn aftanverður á þessu sama svæði.

Eða -- getur verið að fréttin hafi verið þýdd úr ensku? Í því máli er orðið „leg“ notað fyrir það sem við köllum bara fót.

Féll niður þrjá metra

Athugasemdir

[Gunnar Ingi Stórfrændi (IP-tala skráð) 29.7.2008 kl. 15:38]

Alltaf finnst mér gaman að sjá þegar fréttamiðlar eru teknir eilítið í karphúsið fyrir svona skemmtilega orðaðar fyrirsagnir. Sérstaklega þar sem ég hef nú sjálfur verið tekinn allhressilega í gegn af henni systur þinni. En uppreisnartímabilið hefur nú sennilega séð til að ekki síaðist allt saman inn.

Svo langar mig nú bara að hrósa þér fyrir framtakið, Siggi minn, að fylgjast með olíu verðum og reyna bauna á þessa glæpamenn eins og unnt er.

Kveðja úr sveitinni norðan heiða.

Gunnar Ingi

[Sigurður Hreiðar, 29.7.2008 kl. 18:39]

Skemmtilegar pælingar líka hjá þér, Hjördís, og réttmætar. En -- maðurinn féll -- ekkert fellur nema niður, er það?

Ég hef ekkert á móti því að ala fólk upp, eins og þú ert að gera hér við mig, og sé svosem enga stefnuvirkni í því. Það er t.d. sitthvað að ala fólk annars vegar og hins vegar að ala það upp.

Atviksorð eru sosum fullgóð sumhver en rétt að gá að því hvað best er að sleppa þeim. Ég hef t.a.m. alltaf átt bágt með að skilja þegar talað er um að eitthvað (t.d. gengið) sígi upp.

Þess vegna stend ég áfram við fullyrðingar mínar í þessu efni þó ég viðurkenni fúslega að þínar eru fullgildar líka.

Getur þetta sett niður misklíð okkar -- ef hún þá var einhver? Hún var kannski aldrei sett upp?

mbkv