Verst að maður verður að velja eitt

Ef maður er svo heppinn að komast upp eftir árunum við sæmilega heilsu og nær því að fá það sem í þýddum frásögnum heitir eftirlaun en á íslensku eitthvað fyrir ellilífeyris- og örorkuþega (gamalt fólk og öryrkjar eru alltaf sett saman í eina kippu) stendur ekki á tilboðum af ýmsu tagi: læra útskurð og postulínsmálun eða fara í ferðalög til Færeyja eða Grænlands eða jafnvel upp í Kárahnjúka sem enn kváðu standa upp úr þó búið sé að sökkva umhverfi þeirra. Allt ugglaust góðra gjalda vert

En

Stórum áhugaverðara þykir mér námskeið sem boðað er í Reykholti í Borgarfirði dagana 19.-23. maí nk - eða réttara sagt syrpa af námskeiðum: Í samvinnu við Snorrastofu verður boðið upp á námskeið í sögu Snorra Sturlusonar. 1. Farið verður ítarlega í sögu Snorra Sturlusonar, sagt frá rannsóknum, gengið um svæðið og fleira og allt í leiðsögn færustu vísindamanna á þessu sviði. 2. Námskeið í leikrænni tjáningu þar sem byggt verður á íslenskri sagnahefð. 3. Námskeið í jóga þar sem farið verður í fræðin að baki jógaiðkun, mataræði og lífsstíl og kenndar ýmsar æfingar.

Glæsileg námskeið, finnst ykkur ekki? Verst að maður verður að velja eitt en getur ekki verið með í öllum. Ekki í sama skiptið, en ef þetta gengur vel verður sagan endurtekin.

Gist verður á Fosshótelinu í Reykholti með fullu fæði og öðru hóglífi allan tímann.

Fyrir utan þessa megindagskrá verða kvöldvökur tvö kvöldin og má af lítillæti geta þess að ég hef tekið að mér að skipuleggja og sjá um aðra kvöldvökuna. Að auki standa svo til boða öll þægindi hótelsins í Reykholti ef einhver skyldi ögn þurfa að komast í slökun eða bara góðan heitan pott inn á milli dagskrárliða (eða skrópa pínulítið...)

Um þetta allt getið þið lesið nánar á heimaslóðinni http://www.hugleidir.is/ en Hugleiðir er einmitt fyrirtækið sem býður þetta forvitnilega námskeið.

Kannski sjáumst við í Reykholti?

Athugasemdir

[Helga Guðrún Eiríksdóttir, 21.4.2008 kl. 01:11]

Þú lætur þetta nú bara hljóma svo spennandi að maður finnur hjá sér ótímabæra tilhlökkun!

Eins og árin þjóti þó ekki hjá á óbærilega skömmum tíma...  En kveðjur í Reykholt.

[Helga Guðrún Eiríksdóttir, 21.4.2008 kl. 19:42]

PS. Má til með að skjóta því að hér að ég hlustaði á spjallið ykkar Markúsar í morgunútvarpinu á Sögu í morgun. Aldeilis frábært að heyra í þér þar, þátturinn hefði bara mátt vera miklu lengri því það var svo gaman að hlusta. Missti að vísu af fyrstu mínútunum, en ætla að hlusta á þáttinn endurfluttan núna kl 8.

Kvet alla sem tök hafa á til að hlusta!  

[Sigurður Hreiðar, 22.4.2008 kl. 10:50]

Þakka þér fyrir þetta, Helga Guðrún. -- Þetta námskeið í Reykholti er í raun við allra hæfi þó að það miðist að einhverju leyti við þá sem komnir eru á efri ár af því það er ekki öllum hent að eiga lausa heila vinnuviku.

-- Þetta var ósköp þægileg morgunstund með Markúsi. Hef að vísu ekki hlustað á hana sjálfur en var óstressaður og vona að það hafi skilað sér.

Kv.