Heppinn -- eða hvað?

Maður sem var að messa yfir mér og fleiri núna í vikunni sagði ma. eitthvað á þá leið að sá sem væri jákvæður í hugsun væri heppinn -- möo. að jákvæðnin leiddi af sér heppni.

Morgunblaðið, Mogginn, móðurstofnun moggabloggsins, hefur fyrir sið að taka valda kafla úr blogginu og birta á höfuðbólinu (Blaðinu Sjálfu), einn langan og þrjá stutta (hljómar líkt og hringingin í sveitasímanum heima í gamla daga). Í dag var ég þess heiðurs aðnjótandi að fá langa kaflann.

Þar var ég heppinn -- eða hvað?

Í öllu falli: Takk fyrir það, Moggafólk.

Gallinn er bara sá að í gærkvöld var ákveðið að fresta tónleikunum sem bloggið fjallaði um. Nýr dagur hefur ekki verið ákveðinn en ég giska á að hann verði milli jóla og nýárs.

Um þetta er sosum ekkert meira að segja í bili, nema kannski taka sér bessaleyfi til að skæla aðeins til jólavísuna Jóhannesar úr Kötlum og segja:

Nær það verður veit nú enginn / vandi er um slíkt að spá / en eitt er víst að alltaf verður / ákaflega gaman þá.