Land míns föður á Lækjartorgi

Fórum gömlu hjónin niður á Lækjartorg að taka þátt í mótmælum gegn inngöngu í EBS. Gerum ekki mikið af slíku en erum bæði á því að við eigum lítið erindi í EBS.

Þar var fámennt. Giska á svona 50 manns meðan mest var. Svo átti að samþykkja ályktun í lokin en sú romsa sem lesin var upp sem slík var allt of löng og ómarkviss til þess að ég vildi samþykkja hana. Var samt ekki gefinn kostur á neinu öðru. Svona ályktanir eiga að vera örfáar línur og beint í mark -- annars eru þær ómark.

Svo söng ræðumaður nokkur einsöng í lokin, Land míns föður og notaði við það lag Þórarins Guðmundssonar sem mér þykir afar fallegt. Hann hafði líka fallega rödd og hljómmikla og gerði þetta vel. Kunningi minn þarna á torginu sagði mér að þessi maður hefði eitt sinn verið kallaður Doddi Albanínukommi. -- Ég hafði ekki ráðrúm til að spyrjast fyrir um þá nafngift.

Það sem ég hafði helst upp úr þessu var að hitta mína gömlu vinkonu Önnu Ólafsdóttur Björnsson sem reyndar hélt þarna tölu yfir fámenninu. Í samtali -- þar sem ég vildi halda því fram að héðan af væri óráð að halda ekki áfram aðildarviðræðum þangað til séð væri hvað okkur stæði til boða við hugsanlega inngöngu í Ebsið -- sagði hún á móti að í þessum aðildarviðræðum væri verið að flækja okkur í flókið aðlögunarferli að mögnuðu regluverki Ebs, sem við sætum svo uppi með jafnvel þó við höfnuðum aðild í lokin. Og yrðum þá að sæta regluverkinu jafnvel þó við nytum engra hugsanlegra kosta aðildar.

--- Hmmm. Anna er nú vön að vera nokkuð vel lesin á þessu sviði. Er í alvöru verið að snúa á okkur í Brussel?

Athugasemdir

[Eiður Svanberg Guðnason, 16.7.2010 kl. 22:55]

 Nú held ég, að ágætir Mosfellingar þurfi að hugsa sinn gang.

[Gullvagninn (IP-tala skráð) 17.7.2010 kl. 10:17]

Samningaviðræður við ESB rangnefni

[Sigurður Hreiðar, 17.7.2010 kl. 10:43]

Eiður, þegar ég hef sett inn athugasemdir hjá þér hef ég ekki talað tæpitungu. Gott væri að fá góð ráð um hugsanagang. Lofa samt ekki að fara eftir þeim.

[Þráinn (IP-tala skráð) 17.7.2010 kl. 12:48]

Ég hef nú aldrei skilið þessa hræðslu við samningaviðræður.  Það eru nefnilega engar líkur á að ásættanleg niðurstaða fáist. Og ef grannt er skoðað borgar EB kostnaðinn við samningaviðræðurnar.  Reglurnar eru þannig.

Svo má einnig velta því fyrir sér hvort það sé hábölvað að vera hluti af heild sem stendur saman hvað sem á bjátar.  Og ýmislegt gott og þarflegt hefur nú komið yfir okkur frá ESB, má þar nefna reglur um vinnutíma, frjálst flæði vinnuafls sem kemur okkur til góða á þrengingatímum. Ýmsar reglugerðir ESB hafa einnig takmarkað vald misvitra pólitískra loddara og það skyldi nú aldrei vera að það sé ástæða andstöðu margra slíkra.

Finnskir bændur héldu því fram að enginn landbúnaður yrði þar í landi eftir inngöngu.  Ég veit ekki betur en að þeir tóri enn og það sem meira er, í hverri búð sem ég hef kom í þar í landi eru matvæli framleidd í heimalandinu greinilega merkt - reyndar þau útlensku líka - og þau seljast.

Ég man mætavel hafta og forsjárstýringu á Íslandi, þeir einir fengu lán í bönkum sem voru réttrar skoðunar í pólitík, það fengu bara útvaldir lóðir í Reykjavík svo nokkuð sé nefnt.  Ég man biðraðir ég man eftir skömmtunarseðlum, ég man eftir niðurgreiðslum á tilteknum vörum.  Meira að segja brauð voru vísitölutengd.  Ég man eftir allskonar pólitískum leikarskap, stýringu á vísitölu o.fl. o.fl.

 Ég er ansi hræddur um að við munum upplifa eitthvað þessu líkt ef við ákveðum að hér sé allt best og að við munum pluma okkur best ein og sér.

Hafta og neyslustýringarkerfið íslenska byrjaði á svipuðum tíma og aðrar þjóðir Evrópu fóru að sjá til sólar eftir hörmungar seinni heimsstyrjaldarinnar.  Við sólunduðum stríðsgróðanum.  Við spiluðum líka rassinn úr buxunum í gróðærinu.  Við þurfum aðhald.

Ekki vænti ég þess að þú sannfærist enda eru þessi mál ekki einföld.  Lífsreynsla mín er hinsvegar sú að allt sem skerðir völd íslenskra stjórnmálamanna sé af hinu góða.

[Sigurður Hreiðar, 17.7.2010 kl. 13:05]

Við eigum sjálfsagt eftir að taka eina eða tvær snerrur um þetta, Þráinn. Til að byrja með: Hafta- og neyslustýringakerfið íslenskahófst miklu fyrr en þú nefnir. Líttu t.a.m. á einkasölurnar íslensku sem hófust á fjórða áratugnum: viðtækjaverslur ríkisins, bifreiðaeinkasala ríkisins, tóbaksverslun ríkisins, áfengisverslun ríkisins, gjaldeyrisnefndir og innflutningsnefndir. Það af þessu sem hafði þó verið slakað á um tíma var að mestu endurtekið eða endurlífgað á árum „nýsköpunarstjórnarinnar“ sem þú vísar til.

Kv. í bæinn

[Gunnlaugur I., 17.7.2010 kl. 19:08]

Tek ofan fyrir þér Sigurður Hreiðar að hafa tekið skynsamlega afstöðu með fullveldi Íslands og gegn ESB helsinu. Einnig að mæta á þennan fund sem var boðaður af ungu ultra vinstra fólki sem kanski ekki alveg passaði fyrir ykkur hjónin.

En sendiherrann fyrrverandi er nú greinilega í fýlu við ykkur Mosfellingana. Án þess að ég hafi hugmynd um það hvort þú hafir verið stuðningsmaður Samfylkingarinnar þá þykir mér það samt líklegt og ég var það líka eitt sinn en gafst upp þegar þetta dæmalausa ESB trúboð hófst.

Sannleikurinn er sá að þó svo að Samfylkingin sé búinn að tapa allt að fjórðungi fylgis síns undanfarið þá eru þeir sem eftir eru samt illa klofnir í herðar niður meira en nokkur annar flokkur gagnvart þessari ESB aðild.

Allt að 40% stuðningsmannanna eru efins eða beinlínis á móti ESB innlimuninni.

Það er meir og verri klofningur en hjá nokkrum öðrum stjórnmálaflokki, þar sem andstaðan hjá öllum öðrum stjórnmálaflokkum er miklu meira afgerandi og er alls staðar þetta 70 til 80% gegn ESB aðild.

Góðar stundir. 

[Sigurður Hreiðar, 18.7.2010 kl. 19:46]

Þakka innlitið, Gunnlaugur I. Sjálfur verð ég að glíma við mína skynsamlegu afstöðu og á sjálfsagt eftir að flökta eitthvað í því ferli. Ég gerði mér ekki grein fyrir að til fundarins hefði verið stofnað af ungu ultra vinstra fólki. Sé það rétt sýnist mér það helst staðfesta það sem ég þykist hafa séð fyrir löngu að fólk telur sig ungt vel fram yfir það að vera miðaldra. Og ég er bara þónokkuð ungur sjálfur þrátt fyrir árin sem ég á að baki.

Ég verð að hryggja þig með því að þó ég hafi sjaldnast kosið sama flokkinn tvennar kosningar í röð hef ég aldrei kosið krata í landsmálum. Sama í hvaða gæru þeir hafa verið hverju sinni. Ég á líka til að fylgja einu í sveitarstjórnarkosninum en öðru í landsmálum -- geri nefnilega skarpan mun þarna á milli.