Málfar í molum 4

„Fullt af íslenskum dreifingaraðilum fá fría gistingu á einu flottasta resorti Marbella“. – Þessi ósköp fékk ég sent í morgun frá voldugum amrískum framleiðanda fæðubótarefna sem margir Íslendingar trúa á. Forlátið mér þó mig velgji við svona málleysu -- og þá á ég ekki bara við orðskrípið sem notað er á undan staðarheitinu í téðri auglýsingu.

Það er eins og sumir hugsi ekki þegar þeir tala eða skrifa. Annars staðar sá ég talað um að jólasveinar nútímans kæmu til byggða á snjósleðum. Gott og vel, komi þeir af fjöllum ofan geta þeir amk. sumpart rennt sér á snjósleðum, en af samhenginu mátti ráða að átt var við vélsleða.

Sem minnir á annað orð fyrir annan árstíma: sláttuorf -- þegar átt er við vélorf. Pabbi átti sláttuorf og ég vildi gjarnan að það væri til enn, því ég á amk. annan af tveim síðustu ljáunum hans og þó ég yrði aldrei slyngur sláttumaður né snjall að láta bíta hjá mér hef ég oft óskað þess að eiga líka orf og geta þá reynt að hjakka af þúfunum hér í kringum mig með sláttuorfi -- þó það væri ekki vélknúið.

Athugasemdir

[Sæmundur Bjarnason, 1.12.2009 kl. 12:53]

Sigurður ég held að við verðum að láta ýmsar breytingar yfir okkur ganga. Til dæmis þágufallssýkina. Snjósleðana og sláttuorfin jafnvel líka en auðvitað er sjálfsagt að berjast á móti allri þeirri vitleysu sem veður uppi bæði í fjölmiðlum og annars staðar. Stend með þér í þessu, en því lýkur örugglega aldrei.

[Sigurður Hreiðar, 1.12.2009 kl. 15:08]

Nei, þetta stríð vinnst aldrei. En kannski má vinna smá sigur í lítilli lotu og það er áfangi út af fyrir sig. Mér finnst alveg sjálfsagt að malda í móinn. Ég er ekki sáttur við að láta breytingarnar ganga yfir mig þegjandi.

[Ómar Ragnarsson, 1.12.2009 kl. 20:24]

Þið getið bókað að þið eigið viljuga bandamenn, mig og gamlan starfsfélaga minn og vin, Eið Guðnason.

[Karl Tómasson, 1.12.2009 kl. 21:46]

Þið "gömlu mennirnir" eigið án vafa marga bandamenn í þessu málfarsrugli sem versnar með ári hverju. Ágæti Sigurður og það er gott að eiga til menn eins og þig og fleiri sem þreytast seint á því að skrifa og amast um það.

Þegar "kornungur" maður eins og ég, sem er síður en svo alvitur í þessum efnum er farinn að láta taugarnar þenjast, nánast á hverjum degi eftir að heyra m.a. í fjölmiðlafólki tjá sig, þá fer þetta örugglega versnandi.

Bestu kveðjur úr Tungunni frá Kalla Tomm.

[H.T. Bjarnason (IP-tala skráð) 2.12.2009 kl. 00:16]

Ég lít á mig sem stuðningsmann ykkar.

[Óttar Felix Hauksson (IP-tala skráð) 2.12.2009 kl. 01:53]

amast við því Kalli, ekki amast um það

[Guðjón Sigþór Jensson, 2.12.2009 kl. 14:56]

Tek undir þessa ádrepu. Við eigum aðeins eina tungu sem okkur ber að hlúa sem best að eins og viðkvæmri urt. Ella veslast hún upp og verður aðeins heyrandi sögunni til ef ekki hugsað um hana í tíma!

Mosi

[Karl Tómasson, 4.12.2009 kl. 00:05]

Takk fyrir ábendinguna ágæti Óttar Felix.

Eins og ég sagði er ég ekki og enganvegin fullærður en áhuginn er til staðar.

Bestu kveðjur frá Kalla Tomm úr Mosó.