Hve mikill er hagnaðurinn?

Nú þegar samhaldssemi og sparnaður er það sem með þarf á öllum sviðum og fjölmiðlar berjast í bökkum, m.a.s. svo að sumir þeirra knýja á um að láta breyta með lögum því umhverfi sem þeir voru stofnaðir til að standa sig í, undrast maður það rými og það fé sem ausið er í fréttaburð af íþróttum, íþróttafólki og öðru því tengdu.

Hefur farið fram alvöru könnun á því hve mikið hver fjölmiðill hagnast á þessu?

Ég er þakklátur þeim blöðum, til dæmis, sem hlaða þessu óáhugaverða efni í knappan kálf sem auðvelt er að kippa út og fleygja svo það sé ekki að þvælast fyrir manni.

Ef á að þrengja að RÚV meira en orðið er, með takmörkunum á auglýsingatímum, þætti mér ráð að selja RÚV sjálfdæmi eitthvað á þessa leið: Þó skal RÚV heimilt að lengja auglýsingatíma og fjölga auglýsingum að því marki sem útsending leiðinlegra íþróttafrétta er stytt.

Athugasemdir

[Ben.Ax. (Benedikt Jóhannes Axelsson), 12.12.2008 kl. 14:32]

Eigum við þá ekki bara að henda út öllu efni sem okkur líkar ekki?

[Sigurður Hreiðar, 12.12.2008 kl. 14:41]

Ef því er dælt yfir okkur í viðlíka yfirgengilegum mæli og íþróttaruglinu líst mér bara vel á það.

[Ben.Ax. (Benedikt Jóhannes Axelsson), 12.12.2008 kl. 16:11]

Þá verður engin útsending í sjónvarpi á morgun.

[Sigurður Hreiðar, 12.12.2008 kl. 16:56]

Þá er það ákveðið. Og tilgangi nöldraranna náð, þeirra sem vilja heldur fita pyngju 365.