Ég mælist til

 

að hætt verði að tala um menn og konur eins og þetta séu tvær dýrategundir.

Dýrategundin heitir menn. Kvendýrið heitir kona, karldýrið heitir karl.

Ef þess arna væri almennt gætt væri strax í stað stigið gott skref fram á veg til að losna við ákveðna tegund kvenrembu sem að mínu viti er til orðin vegna þess að konum finnst þeirra vegur minni en karla í almennri umræðu. Sem út af fyrir sig er eðlilegt ef notkun orðanna er ekki rétt eða ekki nógu markviss.

Ef konu er gert ljóst í almennri umræðu að hún er maður rétt eins og karlinn hlýtur hún bara af því einu að verða sáttari við hlutskipti sitt.

Getum við ekki sæst á þetta, karlar og konur?

Athugasemdir

[Haraldur Davíðsson, 10.9.2008 kl. 19:54]

Sammál, fólk er fólk og lengra þarf það ekki að ná...

[Páll Geir Bjarnason, 10.9.2008 kl. 20:10]

Osammala. Thetta er tvennt olikt, karl og kona.

[Borghildur Anna (IP-tala skráð) 10.9.2008 kl. 20:11]

Þessu gæti ég ekki verið meira sammála og var því heldur óhress með framtak kvennalistans þegar starfsheiti urðu skyndilega að innihalda nafnorðið kona í ýmsum samsetningum. Hvers vegna þær urðu allt í einu að kallast þingkonur var mér aldrei að fullu ljóst. Sjálf geri ég alltaf athugasemd við að vera annaðhvort kölluð blaðakona eða myndlistarkona.

Ef í framtíðarlandinu verður farið að tala um blaðakarlmenn, myndlistarkarlmenn eða þingkarlmenn skal ég að sjálfsögðu endurskoða afstöðu mína.

[Sigurður Hreiðar, 10.9.2008 kl. 20:19]

Takk fyrir þetta, Borghildur Anna -- það hefur hent okkur fyrr að vera sammála. Og meðan ég man -- til hamingju með nafnbótina amma! Í kvenkyni. Skilaðu kveðju minni til foreldranna.

[Helga Guðrún Eiríksdóttir, 10.9.2008 kl. 21:57]

Jú. Hjartanlega sammála.

[Sigurður Hreiðar, 10.9.2008 kl. 22:26]

Já, Páll Geir, satt er það að karl og kona eru sitt með hvoru móti. Guði sé lof fyrir það. En sama dýrategundin samt.

[Eiður Guðnason (IP-tala skráð) 11.9.2008 kl. 08:26]

Bjarni Benediktsson forsætisráðherra sagði í þingræðu, líklega  1964  eða 1965, að samkvæmt  íslenskri  málvenju fornri og nýrri  væru konur menn.

Á aðalfundi Blaðamannafélags Íslands um  svipað leyti  fékk ég  ádrepu  frá  þeim ágætu konum  Elínu  Pálmadóttur og  Hólmfríði Gunnarsdóttur, sem ég hafði  álpast til að  kalla  blaðakonur.  Þær  sögðust réttilega vera blaðamenn.

Ég hef enn ekki  fyrirgefið  Morgunblaðinu   upptöku orðskrípisins "þingkona". Tala  nú  nú ekki um þvælu eins og  "jafnréttisstýra".

[Sigurður Hreiðar, 11.9.2008 kl. 08:55]

Ef fornar málvenjur eru okkur fjötur um fót finnst mér að við ættum að snúa við þeim baki, Eiður minn, hvað sem Bjarni Ben kann að hafa sagt eða aðrir fróðir menn.

Þær fyrrum starfssystur okkar Elín og Hólmfríður hafa báðar fæturna á jörðinni og bein í nefinu og gera sér ljóst að kyn starfsheitis þeirra hefur ekkert með þeirra eigin kynferði að gera.

En mér þótti taka steininn úr þegar maður sem hljómaði sem karlkyns og hafði útlit svipað því þóttist vera ráðskona einhverra samtaka.

[inqo, 11.9.2008 kl. 09:37]

Ertu að vísa í þennann hluta úr blogginu hjá Sóleyju T.

3. "Menn þurfa að ná saman um þetta." -Ljósmæður eru konur Björgvin!

Ef að feministarnir verða ofan á þá verður maður að fara pússa rykið af kven- og karlheitum allra dýrategunda. Púff það verður mikið verk.

[Sigurður Hreiðar, 11.9.2008 kl. 09:42]

Ég hef ekki ennþá vísað í neitt hjá Sóleyju T. En ljósmæður eru menn, svo mikið er víst.

[Helga Guðrún Eiríksdóttir, 11.9.2008 kl. 09:45]

Í athugasemd hjá mér nr. 127 í síðasta bloggi er kemur leyniskytta og snuprar mig svolítið úr launsátri:

"Þú ert enginn töffari Helga Guðrún og þessi óþekkt þín á meira skylt við greindarskerðingu en hetjuskap. Og svona by the way, ef það er rétt sem sumir halda fram, að þú sért svo frábær penni, geturðu þá upplýst mig um hvenær það varð að málvenju að tala um að þagga ofan í fólki?" 

Ég hef sagt jöfnum höndum að "þagga niður í" og að "þagga ofan í". -Er þetta vitleysa í mér?

[Sigurður Hreiðar, 11.9.2008 kl. 11:17]

Já, Helga Guðrún, því miður held ég að þetta sé vitleysa hjá þér. Nema þetta sé málvenja í Skagafirði...

Það er svo erfitt að átta sig á landshlutabundnum mállýskum. Ég hef stundum rekið hornin í að tala um svefnAherbergi. Svo kemst ég að því að svefnaherbergi mun vera landshlutabundin austfirsk málvenja. Og viti menn:

[Sigurður Hreiðar, 11.9.2008 kl. 11:18]

hér að ofan vantaði niðurlagið: í kvittun sem ég fékk í gær er svo talað um svefnIherbergi! Og hvað nú?

[Landfari, 11.9.2008 kl. 17:39]

Sigurður, ert þú ekki í fyrstu málsgreininn í athugasemd nr. 8 að misskilja eitthvað fyrsu málsgreinina í athugasemd nr. 7 hjá Eiði?

[Sigurður Hreiðar, 11.9.2008 kl. 18:26]

Kann vel að vera, Landfari, en stend samt við það að fornar málvenjur mega ekki verða okkur fjötur um fót.

[Landfari, 11.9.2008 kl. 19:32]

Ég held að fornar málvenjur styðji þitt mál frekar en hitt og áðurnefnd tilvitnuni í Bjarna Ben gerir það óneitanlega.

Persónulega er ég líka alveg sammála þér þó það vegi nú ekki eins þungt og stuðningur Bjarna Ben.

Ef almennt á að fara að nota orðið "þingkona" um kvenkyns þingmenn er sjálfgefið að nota verður orðið "þingkarl" um karlkyns þingmenn. Það þykir mér setja þingmenn niður, svona almennt talað. Eina jákvæða við það væri ef þeir lækkuðu þá samsvarandi um eina þrjá launaflokka. Þann pening sem þannig sparaðist mætti þá nota sem innlegg í ljósmæðradeiluna.

[Emil Örn Kristjánsson, 12.9.2008 kl. 16:42]

Hundrað prósent sammála þér, Sigurður. Ég hef sjálfur fyrir sið þegar ég tala eða rita um menn að skjóta stundum inn í "karlar og konur". Samanber: "Evruupptaka er ekkert annað en vafasöm skyndilausn sem ekki nokkur ábyrgur maður (karl eða kona) ætti svo mikið sem velta fyrir sér."

Hef ég gert þetta til þess að ekki fari á milli mála að samkvæmt mínum málskilningi á orðið maður við bæði karla og konur.

Það ber vott um lélega málvitund að þurfa sífellt að kvenkenna öll möguleg störf og stöður. Það er sitthvað málfræðilegt kyn og líkamlegt. Því geta karlar verið kempur, hetjur, lyddur og gufur. Rétt eins og konur geta verið stjórar og fræðingar og Bergþóra verður áfram drengur góður.

[Aðalsteinn Baldursson, 13.9.2008 kl. 01:10]

Að mig minnir þá sagði frú Vigdís Finnbogadóttir þegar hún var í framboði til embættis forseta Íslands að "konur væru líka menn". Enda er talað um kvenMENN og karlMENN.
Ég er innilega sammála þér í þessu Sigurður. Hættum að kýta um þetta endalaust.

[Helga Dís Sigurðardóttir (IP-tala skráð) 22.9.2008 kl. 09:41]

Mér virðist þetta vera kulnaður þráður þannig að kannski er ekki til neins að vera að leggja orð í belg í þessari annars endalausu og mjög svo útjöskuðu umræðu.

Nema hvað, enginn hefur nokkurn tímann sagt við mig ,,hvað er að þér, maður...!" eða ,,heyrðu, manni"... eða annað í þeim dúr. Þegar ég hef verið spurð hvað sé að mér hef ég samt stundum verið kölluð manneskja, kona, stelpa eða bara mínu ágæta eiginnafni.

Af hverju?

Það vita allir, líka þeir sem óttast og skelfast breytingar á okkar ágæta tungumáli sem til allrar hamingju hefur möguleika á að breytast og lagfærast dag frá degi.

Á sama hátt dettur mér ekki í hug að spyrja höfund þessarar færslu eftirfarandi: ,,Hvað er að þér, manneskja?" því að þó hann sé strangt til tekið af sömu dýrategund og ég og samkvæmt flestum skilgreiningum því einnig manneskja, þá er þetta bara staðreynd, á sama hátt og ég er ekki maður og langar alls ekkert til að verða það.

[Landfari, 22.9.2008 kl. 13:23]

Helga Dís, ertu ekki kvenmaður?