Að nýta sér matarholurnar

Efnaminni fjölskyldur nýta sér síður frístundakortin sem eiga að vera til að gera börnum kleift að stunda félagslegt tómstundastarf á vegum Reykjavíkurborgar, án tillits til efnahags foreldranna.

Það skyldi þó ekki vera svo að skýringin sé að einhverju leyti hin sama og skýringin á því hvers vegna amk. sumar þessara efnaminni fjölskyldna eru efnaminni?

Manni dettur í hug að þær séu ekki eins vakandi fyrir þeim útispjótum sem hægt er að hafa í lífsbaráttunni og hvernig hægt er að nýta sér matarholurnar.

Hugsanlega er það viss lífsstíll að endar nái sjaldnast saman hjá sumum, meðan aðrir gera furðulega mikið út litlu.

Athugasemdir

[Ásgerður Jóna Flosadóttir, 12.8.2008 kl. 20:22]

Sæll Sigurður, tilkoma frístundakortanna er mjög jákvæð.  Fram hefur komið í fréttum að efnaminni fjölskyldur nýta sér síður þessi kort fyrir börn sín.  Ein ástæða af mörgum kemur upp í huga minn.  Til að stunda félagslegt tómstundastarf þarf ákveðin fatnað t.d. góða skó, útivistarfatnað og fl.  Efnalitlar fjölskyldur hafa ekki efni á þessum útbúnaði, því miður. 

Með kveðju,

[Sigurður Hreiðar, 12.8.2008 kl. 21:47]

Þakka þér fyrir innlitið, Ásgerður Jóna. Eins og vænta mátti hefur þú ábyggilega mikið til þíns máls, um að búnaðurinn þurfi að vera í lagi. Eins og ég þykist hafa nokkuð til míns máls þegar ég tæpi á því að það sé viss lífsstíll að vera í litlum efnum -- eða réttara sagt að lítil efni stafi af vissum lífsstíl eða hann sé vel meðvirkur í þeim efnum.