Hraðafasismi og bókstafstrú

Hraðinn sem slíkur drepur ekki. Það er þegar hraði fer saman við aðgæsluleysi og heimsku sem hann verður hættulegur. Við lestur fréttarinnar sem þetta blogg vísar til kemur enda í ljós að í 5 af þessum 15 banaslysum voru bílbelti ekki notuð. Hafði það e-ð að segja með það að slysið varð banaslys? Þrjú slysanna má rekja til ölvunar og þrjú í viðbót til svefns og þreytu. Þá er talan komin í 11. Eitt er talið örugglega sjálfsvíg og nú eru eftir þrjú slys þar sem fréttin amk. greinir ekki frá neinu umfram of mikinn hraða.

Ekki skal dregið úr mikilvægi þess að haga hraða eftir aðstæðum. En það er fásinna að láta að því liggja að hraðari akstur en heimill er samkvæmt einhverri allsherjarreglu sé banvænn í sjálfu sér eða ævinlega óábyrgur. Hann kann að vera of mikill samkvæmt bókstafnum -- en er æskilegt að vera bókstafstrúar?

Ég held að við ættum að breyta um áherslur í umferðaráróðri. Í staðinn fyrir að leggja ofuráherslu á hraðakjaftæði sem óskilgreint hugtak eða rígbundið við lögleyfðan hámarkshraða ættum við að prófa svo sem eitt ár að leggja áherslu á ábyrgan akstur, akstur með fyrirhyggju. Að ökumenn horfi fram á veginn og lesi í það sem framundan er. Hvernig vegurinn liggur og hvað er að gerast hjá öðrum vegfarendum framundan. Láti ekki það sem við komum að eftir 2-300 metra koma sér á óvart. Gott og blessað að fylgjast með bílnum sem er næstur fyrir framan okkur. En í hvaða kringumstæðum er hann að lenda? Eða þriðji bíll fyrir framan hann? Þetta eru allt hlutir sem koma okkur við.

Um þetta mætti fjalla miklu meira en mergurinn málsins er þessi: Við erum of lengi búin að stunda hraðafasisma sem slíkan en látið undir höfuð leggjast að prédika ábyrgan akstur með fyrirhyggju. Að kenna fólki að lesa í umferðina og umhverfi sitt.

Hraðakstur algengast orsök banaslysa

Athugasemdir

[Óskar Þorkelsson, 30.6.2008 kl. 15:32]

samt var það hraðinn sem drap Sigurður... hvernig sem hann fór að þv,í þá var það samt hraðinn....

[Friðrik (IP-tala skráð) 30.6.2008 kl. 15:36]

Frábært, ég er algerlega sammála og mjög ánægður að það er einhver sem sér hlutina í sama ljósi og ég.  Þetta er ferlegt hvernig verið er að hanka menn fyrir að keyra einhverjum kílómetrum of hratt, ábyrgir og góðir ökumenn lenda í þessu jafnt og aðrir, með því að fylgja umferðarhraða er maður í hættu um að verða rukkaður um stórfé.  Allt of miklum kröftum eitt í þessa ofurnákvæmni á hraðann.  Þessi áróður er stundum svo kjánalegur að maður fær á tilfinninguna að þetta snúist um peningaplokk fremur en að bjarga mannslífum.

[Friðrik (IP-tala skráð) 30.6.2008 kl. 15:54]

Til viðbótar í tilefni af innleggi Óskars Þorkelssonar.

 Ég er ekki sammála, í mínum augum er þetta rökleysa sem einkennir yfirlýsingar varðandi umferðarhraða.  Þ.e. með því að segja að í ákveðnum tilfellum af dauðaslysum hafi verið ekið yfir hámarkshraða felst alls engin sönnun fyrir því að fólkið hefði ekki látist ef ekið hafi verið á 90.00 km/klst (eða hvaða hámarkshraði var í hverju tilfelli).  Raunar stórefa ég að svo sé. 

Ég vil taka fram eins og fyrsti ræðumaður að ég er ekki að mæla hraðakstri bót og keyri ekki hratt sjálfur.  Staðreyndin er sú að maður verður eiginilega að keyra á ca 85 eins og staðan er í dag til að vera öruggur um að lenda ekki í fjárútlátum því að það er ómögulegt að fylgjast svo stíft með hraðamælinum að maður renni ekki endrum og eins í ca 95 ef maður er eð reyna að halda sig á 90.  Það væri í það minnsta mun hættulegra að mæna á hraðamælinn stanslaust en að aka á 95.  Það sama á við um cruise control, ef maður stillir á 90 þá getur bíllinn sigið aðeins hraðar til að byrja með í brekkum.  Þekkið þið einhvern sem keyrir eitthvað af ráði og hefur ekki fengið hraðasekt?  Eru þetta allt óábyrgir hálvitar?

[Ásgrímur Hartmannsson, 30.6.2008 kl. 16:22]

Auðvitað er þetta peningaplokk.

[Óskar Þorkelsson, 30.6.2008 kl. 18:14]

Ég fæ að meðaltali 4 á ári.. hraðasektir... hraðinn drepur drengir og stúlkur.. ekki nokkur leið að mótmæla því.

Sigurður kemur aftur á móti inn á aðra staðreynd og hún er sú að stjórnvöld eru að draga lappirnar í mikilvægum umferðarumbótum.. nema um sé að ræða göng fyrir 800 manns hingað og þangað..

4 földun suðurlandsvegar til selfoss og sömuleiðis vesturlandsvegar til borgarness.. sundabraut og klára helv$% keflavíkurveginn..

en það er alltaf hraðinn sem drepur ekki loka augunum fyrir því. 

[Gísli Sigurðsson, 30.6.2008 kl. 18:48]

Það er rétt eins og það er ekki fallið sem drepur mann, heldur helvítis lendingin.

[Óskar Þorkelsson, 30.6.2008 kl. 18:56]

já og lendinginn verður harðari eftir því sem hraðinn er meiri 

[Högni Jóhann Sigurjónsson, 30.6.2008 kl. 19:02]

Ég er sammála þér Sigurður.

[Guðmundur Jónsson, 1.7.2008 kl. 08:56]

Þetta er rödd sem verður að heyrast meira. Hérna tengill á grein sem ég skrifaði um þetta í firra

Meira um þetta http://mummij.blog.is/blog/mummij/entry/291499/

[Helga Guðrún Eiríksdóttir, 1.7.2008 kl. 09:34]

Níutíu km hámarkshraði á hraðbraut árið 2008 er, fyrir utan að vera tíma- og talnaskekkja, líklegri til að valda slysum heldur en ef hann væri 120-130, eins og nú er reglan víðast hvar á vesturlöndum. Hægfara faratæki valda pirringi og framúrakstri og það combó fullyrði ég að sé hættulegra allar heimsins vegarollur.

[Óskar Þorkelsson, 1.7.2008 kl. 10:00]

Helga, það eru engar hraðbrautir á íslandi.. nemandinn hefur lög að mæla.