Lélegir 25% glaðningar

Er það glaðningur að fá 25% afslátt af fokdýrri veislumáltíð sem manni hafði aldrei dottið í hug að kaupa sér? Eða 2-300 kr. afslátt af hamborgara sem aldrei stóð til að kaupa? Og geta ekki einu sinni boðið með sér betri helmingnum í þessa 75% veislu eða afsláttarkjöthleif?

Tilkynni, hr. höfuðsmaður (yndislegt orðatiltæki úr Góða dátanum Svæk), að yfirritaður lifir ekki lengur í Núinu. Lét glepjast einhvern tíma í vetur af því að fá daglega einhverja lítilfjörlega auglýsingu í tölvuna sína með loforð í bakhöndinni um „glaðning“. Það er sennilega fjárhættuspilagenið í mér sem réði því að ég féllst á að vera skráður í nuid.is, því þar var ýmsu fögru lofað:

       
Smelltu á einn af kössunum og þú gætir verið á leiðinni til Barcelona, fengið frítt bensín eða magnaða afsláttarmiða o.fl. á Núinu!

Ég er búinn að fá allskonar 25% glaðninga og annað álíka ómerkilegt. Jú, ég lét einu sinni til leiðast að kaupa flatböku (=pitsu) með hundraðkall afslætti eða svo, en bara af því ég kaupi stundum þessháttar laufabrauð hvort sem er. Jú, á síðasta brúðkaupsafmæli bauð ég konunni út að borða á Carpe Diem á 25% afslætti -- en þar var þó afslátturinn fyrir tvo og við höfum stundum gert okkur dagamun af þessu tilefni hvort sem er.

En nú nenni ég þessu ekki lengur. nuid.is er úr sögunni í minni tölvu. Kannski er það besti glaðningurinn sem veifað hefur verið framan í mig úr þessu ómerkilega trikkhorni.

Athugasemdir

[Hulda Bergrós Stefánsdóttir, 7.9.2007 kl. 16:32]

Hjúkk passaði mig heldur betur eð láta þetta ekki freista mín á sínum tíma

[Helga R. Einarsdóttir, 8.9.2007 kl. 22:02]

Blessunarlega er þetta eitt af því sem ég hef látið alveg eiga sig. Ekki vegna þess að mér finnist vont að græða, heldur af því ég forðast að kíkja á það sem ég ekki veit hvað er.