Sauðdrukkinn en ekki á felgunni

Dæmi um máttlaust orðalag, þegar flandur kolruglaðs fólks í akandi umferð er til umræðu. Um það ástand sem hér er til umræðu eru til mörg meira krassandi orð: Blindfullur, haugdrukkinn, augafullur, dauðadrukkinn, sauðdrukkinn, svínfullur, útúrdrukkinn, þreifandi fullur. Allt orð sem líklegri eru til að ná eyrum/augum manna (kvenmenn meðtaldir) og ef til vill grugga upp einhverja ábyrga hugsun hjá einhverjum.

Persónulega líst mér hvað best á orðið sauðdrukkinn í þessari umræðu. Orðið hefur þann góða kost að vera gagnsætt og lýsa þeim þankagangi sem bærist bak við svona hegðun. Hins vegar held ég að ekki hefði verið gott í þessu dæmi að nota orðasambandið „á felgunni“, sem einnig er notað um það að vera perufullur -- vegna þess að í þessu dæmi er engin vísbending um að hjólbarðar aumingja reiðhjólsins hafi ekki verið loftfylltir svo sem hæfir.

Handtekinn vegna ölvunar á reiðhjóli