Er þetta kyntengt starf?

Hvaða fjandans penpíuháttur er þetta? Svo vel þykist ég þekkja Guðfríði Lilju að henni sé enginn greiði gerður með því að kyntengja þetta nýja starf hennar. Hún hefur verið stjóri þar sem okkar fundum hefur borið saman (eingöngu á erlendri grund þar sem hún gengdi stjórnunar- og skipulagsstarfi hjá þekktum bílaframleiðanda). Það starf var ókyntengt og svo er einnig um framkvæmdastjóra stjórnmálaflokka, rétt eins og skólastjóra, ráðherra, hjúkrunarfræðinga og sjálfsagt eitthvað fleira.

VG -- ekki gera svona lítið úr Guðfríði Lilju!

Guðfríður Lilja framkvæmdarstýra þingflokks VG

Athugasemdir

[Kristín Tómasdóttir (IP-tala skráð) 3.9.2007 kl. 16:16]

Ég get ekki séð að Guðfríður Lilja sé stjóri frekar en herra eða maður. Mér finnst hún aftur á móti ágætis kona, stýra og frú!  

[Sigurður Hreiðar, 3.9.2007 kl. 16:32]

Ég tel hana hiklaust til manna og hún getur orðið prýðis herra, t.d. ráðherra. Maður er hún hins vegar fortakslaust, kvenmaður eða þingmaður eða hvernig sem Kristín vill líta á það. Og ég dreg ekki í efa að hún sé ágætis kona og frú, vel kann ég við hana sem fyllilega frambærilegt eintak af tegundinni maður.

[Eiður Svanberg Guðnason, 4.9.2007 kl. 11:18]

Samkvæmt íslenskri málvenju fornri og nýrri eru konur menn.

[Tómas Guðbjörn Þorgeirsson, 4.9.2007 kl. 12:12]

Alveg sammála þér Sigurður...stakk mig svolítið að sjá framkvæmdarSTÝRA...Kjánalegt eitthvað.  Flugstýra, framkvæmdarstýra, markaðsstýra, sölustýra, bílstýra...hvar endar þessi vitleysa hehe