Mildara var yfirvaldið

í minni sveit hér áður fyrr. Lítið atvik frá því ég var 16 ára stendur mér alltaf ljóslifandi fyrir augum og eyrum, þegar Stefán Þorláksson hreppstjóri (Stefi í Dal) króaði mig af úti í horni í forsalnum í Hlégarði á einhverju mannamóti, tók vinsamlega í öxlina á mér og sagði með sínu syngjandi kverkmælta skrolli: Þú ættir ekki að keyra svona mikið próflaus, Siggi minn. Það getur alltaf orðið ástím.

Ellefu ungir ökumenn settir í akstursbann á Selfossi

Athugasemdir

[Markús frá Djúpalæk, 20.8.2007 kl. 13:29]

Það er ekki víst að ungir menn í dag tækju tiltali hreppstjórans eins vel og þú örugglega gerðir á sínum tíma.

[Þorsteinn Sverrisson, 20.8.2007 kl. 19:57]

Sæll Sigurður Heiðar.  Þessar sveitalöggur áður fyrr voru oft mildar og mannlegar. Ég man eftir einu góðmenni sem tók að sér löggæslu á dansleikjum fyrir austan. Eitt sinn stöðvaði hann nokkra stráka í bíl á leiðinni af balli.  Vissi örugglega að þeir voru allir búnir að drekka eitthvað. Hann spurði þennan sem sat undir stýri : "Eruð þið búnir að drekka strákar".  "Já við erum allir blindfullir", sagði ökumaðurinn.  Þá sagði löggan: "Þá fariði bara beint heim".

[Helga R. Einarsdóttir, 20.8.2007 kl. 20:45]

Ég viðurkenni alveg að núna er ég bara ánægð með "sýsla". Mig grunar nefnilega að þessir blessaðir drengir séu margir að lenda í þessu klúðri vegna eigin fíflaláta hér innanbæjar um nætur.  Kannski er það eins í öllu þéttbýli, ég veit það ekki, en hér er iðulega ekki svefnfriður fyrir spóli, inngjöfum og dj----gangi. Gúmíbrunalyktina leggur innum gluggana á elliheimilinu  og plön og götur um allan bæ eru löðrandi í svörtum dekkjaleifum. Blessaðir stubbarnir virðast ekki kunna að aka bílum með eðlilegu móti eftir kl. ellefu á kvöldin. Kannski er þetta íþrótt?  Vantar þá ekki svæði til að stunda hana? Það endar alltaf svona. "Þetta er bænum að kenna"!

[Sigurður Hreiðar, 21.8.2007 kl. 07:54]

Markús og Helga R -- ég er ekki viss um að stubbarnir nú til dags séu verulega frábrugðnir því sem gerðist þegar ég var milli fermingar og tvítugs. Kannski eitthvað agalausari, jú, þeir sem hafa alist upp við að enginn fullorðinn væri heima mestallan daginn, en meginmunurinn er kannski sá að þeir hafa með einhverju móti yfirráð yfir aflmeiri tækjum en við höfðum handa á milli og færri staði utan almannafæris til að láta reyna á tækin og sjálfa sig. Þannig að þetta er ábyggilega rétt hjá þér, Helga, það vantar staði fyrir þessar æfingar.

Og Þorsteinn: Seinna nafn mitt er Hreiðar, ekki Heiðar -- þó það sé út af fyrir sig ágætis nafn líka!