Glasið á þúsundkall

Sá einhvers staðar klausu um að fjáðir ferðamenn hækkuðu verðlag á ýmsu hér hjá okkur, vörum og þjónustu. ég er ekki viss um að þetta sé rétt heldur mun það vera græðgi þeirra sem selja sem veldur þessari hækkun -- og vissan um að það sé ærinn spölur til næsta keppinautar.

Ég hef ekki víða farið í sumar. Sá sem á hús sem stendur á 2000 fermetra lóð, sem er eins og minibúgarður, á ekki mikið heimangengt. Þó skruppum við hjón í dálitla skemmtiferð snemma sumars og gistum á auglýstum gististað úti á landi. Það var ágætis gisting en maturinn kannski ekki nógu góður miðað við verð. Þó var það einkum fljótandi veitingar sem okkur ofbauð verðið á. Glas af óskilgreindu rauðvíni á þúsundkall, eða dolla af bjór á þúsundkall.

Þetta kalla ég græðgi.

Athugasemdir

[Ben.Ax. (Benedikt Jóhannes Axelsson), 20.8.2010 kl. 15:41]

Okur finnst mér skemmtilegt orð yfir það að selja okkur eitthvað sem enginn þarf á að halda á margföldu innkaupsverði. Ég er að reyna að hætta að láta okra á mér og kaupi t.d. ekkert á bensínstöðvum nema bensín.