Fyrsti lögreglubíll á Akureyri

Á sínum tíma leitaði ég eftir því sem ég hafði vit til eftir mynd/myndum af fyrsta lögreglubíl á Akureyri. Sá mun hafa komið þangað um miðjan fimmta áratug síðustu aldar, bíll fenginn frá Sölunefnd setuliðseigna eins og þá hét sú stofnun sem sá um að koma notuðum herbílum í hendur Íslendinga.

Gísli heitinn Ólafsson, lengi yfirlögregluþjónn á Akureyri, sagði mér að það hefði verið mikill munur að fá bílinn. Áður hafði lögreglan farið ferða sinna um staðinn gangandi eða í besta falli á reiðhjóli, sem getur verið amasamt á Akureyri, og umhendis þegar þurfti að fara með fullan mann til að láta hann sofa úr sér. Ekki mundi Gísli glöggt um þennan bíl, en aðrar heimildir hafa gefið mér hugmynd um hverrar tegundar hann hafi verið.

Enn er ég að leita. Kannski bloggið geti gefið mér einhverja vísbendingu. Ég trú ekki öðru en að þessi bíll hafi einhvers staðar álpast inn á ljósmynd. Akureyringur góður, heimabúandi eða brottfluttur, er mynd af honum til í gamla albúminu þínu?

Athugasemdir

[Einar Þór Strand, 17.1.2010 kl. 11:31]

Sigurður ég er ekki viss um að ég fari með réttmál en mig minnir að ég hafi heyrt að þetta sé sami bíllinn og síðar varð sveitabíll hjá Slökkviliði Akureyrar Dodge carry-all eða hvort þeir komu um svipað leiti.

[Guðjón Sigþór Jensson, 18.1.2010 kl. 11:33]

Sæll Sigurður og bestu þakkir fyrir gömlu árin sem eru að baki.

Skal koma þessu áleiðis til góðs kunningja míns og fyrrum vinnufélaga á Akureyri. Hann er mikill grúskari sem við og mun ábyggilega finna heilmikið af upplýsingum.

Kveðja

Mosi 

[Sigurður Hreiðar, 18.1.2010 kl. 13:52]

Takk fyrir það Mosi. Ég hef spurst heilmikið fyrir norður þar og veitir ekki af allri liðveislu sem ég get fengið.

Var í gær að fá myndir af herjeppa á Norðurlandi sem mér þykir mikið til koma.

[Jón Ingi Cæsarsson, 18.1.2010 kl. 18:29]

sælll..

það var árið 1945, um sumarið, að ríki og bær sameinuðust um kaup á lögreglubíl.  Það var stuliðsbifreið með drif á öllum hjólum ...hafði verið hersjúkrabíll.. og hann kostaði 17.000 krónur..

mér sýnist á myndinni að þetta sé Dodge Weapon  og það er mynd og texti um þetta í Sögu Akureyrar V. eftir Jón Hjaltason... á bls 30 og þar stendur bíllinn utan við lögregluvarðstofnuna... að Smáragötu 1

kv Jón Ingi

[Jón Ingi Cæsarsson, 18.1.2010 kl. 18:29]

setuliðs... átti að standa þarna.

[Sveinn í Felli (IP-tala skráð) 19.1.2010 kl. 08:22]

Þú ert ekki að tala um 'Svörtu Maríu', svarta station-bílinn með A-4XX númerinu ?

Ég á hérna mynd af honum fyrir framan 'Turninn' hér í Þorpinu, tekin einhvern tíma fyrir 1960; myndin var á sýningu fyrir ekki löngu uppi í Glerárskóla. Líklega er þetta samt yngri bíll sem um ræðir.

[Sigurður Hreiðar, 19.1.2010 kl. 14:10]

Sæll Sveinn í Felli -- kannski er nú ofmælt að kalla þann bíl sem ég er að leita eftir stationbíl. -- En geturðu nokkuð skannað þessa mynd og sent mér? Þú finnur netfangið mitt í símaskránni.

[Hörður (IP-tala skráð) 20.1.2010 kl. 10:39]

Sæll Sigurður

Mér finnst líklegt að Sverrir í Ystafelli viti þetta.  Hann er með Samgönguminjasafnið í Köldukinn.

[Sigurður Hreiðar, 20.1.2010 kl. 19:19]

Sæll, Hörður. Á sínum tíma var líka leitað eftir mynd af lögreglubílnum á Ystafelli. Þá var Ingólfur enn á meðal vor, en Sverrir var líka með í málinu og veit vel af þessari leit minni. Mér þykir ólíklegt að honum hafi áskotnast slík mynd síðar án þess að láta mig vita af henni.