Berrassaður á berangri

Ég hef rekið mig á að það er dálítið tvíbent að blogga út frá mál- eða stafsetningarvillu í frétt mbl.is. Maður á sem sé á hættu að vera tekinn alvarlega og villan í fréttinni snarlega leiðrétt. Þá stendur maður eftir berrassaður ef svo má segja og enginn skilur um hvern fjandann maður hefur verið að þvaðra.

Nú síðast fjallaði blogg mitt um frétt af VillingaRholtsvegi sem væri lokaður og ég skildi ekki hvernig stóð á þessu R-i í nafninu. Það hefur viðkomandi blaðamaður heldur ekki skilið við nánari athugun, ekki fremur en ef staðhæft hefði verið að hann væri blaðaRmaður, en tekið sig til og fjarlægt þetta vitlausa R.

Eftir stendur blogg hjá mér gjörsamlega berskjaldað og á berangri, út af fyrir sig jafn vitlaust og r í Villingaholti eða Bolungavík eða Blikastaðanesi

og ég verði bara að sæta því. 

Athugasemdir

[Ben.Ax. (Benedikt Jóhannes Axelsson), 10.9.2010 kl. 21:30]

Ef Mogginn getur ekki leiðrétt sig sjálfur verða aðrir að gera það.

[Þráinn (IP-tala skráð) 10.9.2010 kl. 22:52]

Laun heimsins eru vanþakklæti

[Sigurður Hreiðar, 10.9.2010 kl. 23:21]

Takk fyrir komuna, BenAx og Þráinn. Þið stuðlið að því að ég get hysjað upp um mig, altént til hálfs!