Dragbítarnir skapa mesta hættuna

Það er alltaf sama bókstafstrúin í hægagangaofstækinu -- að allt sé unnið með því að keyra niður ökuhraðann. Vissulega má til sanns vegar færa að minni hraði gefur minna högg ef til óhapps kemur, en alls ekki sjálfgefið að eðlilegur ökuhraði leiði til þess að höggin verði fleiri.

Athyglisverð frétt var í Desert News í Utah 25. okt. s.l. þess efnis að þegar leyfður hámarkshraði á tveimur völdum vegarköflum í suðurhluta ríkisins var hækkaður úr 75 mílum pr. klst. (121 km/klst) í 80 mílur (tæpl. 130 km/klst) lækkaði raunhraði á þessum sömu köflum (www.desertnews.com/article/705338447). Það er að segja, lægri mörk hraða yfir 75 m/klst urðu lægri, en flestir samt héldu áfram að keyra á 85 m/klst eins og verið hafði fyrir breytinguna. Og slysum hefur ekki fjölgað.

Mig minnir að svipað hafi gerst á einhverjum tilteknum vegum í Svíþjóð fyrir eitthvað um 20 árum eða svo. Gott ef ekki Frakklandi líka. En hér dettur mönnum ekkert annað í hug til útbóta en endalaus hraðafasismi, þó það hafi margsinnis sést og sannast að það er miklu fremur skynsemi og tillitssemi sem ætti að höfða til -- og er ekki síður mikilvægt á 90 km hraða eins og á 110-130.

Í nefndri grein kemur einnig fram það álit að það sé ekki hraðinn sem slíkur sem mestu máli skiptir fyrir örugga umferð, heldur að sem flestir séu á sama hraða. Sem með öðrum orðum þýðir að það eru dragbítarnir í umferðinni, þeir sem fara hægar en meirihlutanum þykir eðlilegt, sem skapa mesta hættuna.

Hvernig væri að taka myndir af þeim?

Athugasemdir

[Birgir Birgisson (IP-tala skráð) 5.11.2009 kl. 12:01]

Enn einu sinni kemur skýrt í ljós hversu öfugsnúin tölfræðin getur orðið.

Það má vel vera að svona hreint tölfræðilega séð, sé best að "dragbítarnir", eins og þú nefnir þá, aki hraðar svo þeir hægji ekki um of á öllum hinum.  En hefurðu reynt að velta því fyrir þér hvers vegna þeir aka ekki hraðar en þeir gera?  Getur ekki verið að orsökin liggi í því að þeim finnist erfitt að hafa fulla stjórn á því sem þeir eru að gera?  Kannski þeir óttist hvað getur gerst ef þeir aka hraðar en þeir ráða við?  Og hver er svo þín lausn?  Að auka óöryggið.  Nei, þetta er ekki alveg nógu vel hugsað hjá þér.

Dæmigert fyrir fólk sem vill að allir hugsi og hegði sér nákvæmlega eins og það sjálft.  Án þess að huga að því hvort það sé skynsamlegt.  Og hvort er nú mikilvægara þegar talið berst að umferðaröryggi, skynsemi eða "ég-fyrst" reglan ?

[Sigurður Hreiðar, 5.11.2009 kl. 15:52]

Auðvitað á skynsemin að vera í fyrirrúmi. Þess vegna er hraðafasisminn einn út af fyrir sig alröng nálgun á vandamálinu.

Ef menn eru ekki þess umkomnir að halda eðlilegum umferðarhraða er skynsamlegast að láta aðra um aksturinn.

Þegar dragbítarnir fara að mynda raðir á eftir sér er voðinn vís. Og dragbítunum um að kenna. Þá er „ég fyrst“ reglan sem þeir fara eftir orðin hættuleg.