Í Lívæs gallabuxum á Pors í Mjúnikk

Í síðasta bloggi talaði ég obbolítið um þá tilhneygingu íslenskra -- og vísast fleiri -- að reyna að hneygja framburð erlendra orða, staðarheita og tegundaheita, að enskum framburði. Notaði sem dæmi kanaríeyjuna Tenerífe, sem heitir svo að spænskum framburði, en margir íslendingar eru að burðast við að kalla Teneríf.

Ég hef fengið nokkurt skens fyrir þetta á förnum vegi síðan en læt mér í léttu rúmi liggja. Ég held ég hafi einhvern tíma bloggað um það hvernig íslendingar sem kunna sig vilja kalla bílategundina Porsche Pors og halda að þeir séu nú aldeilis menn með mönnum, þegar þessi þýska tegund heitir auðvitað Porshé eða því sem næst, á þarlendu máli. Og gallabuxurnar sem einu sinni voru vinsælar og hétu eftir Austurríkismanninum Leví Strauss eiga auðvitað að heita Levís gallabuxur en ekki Lívæs, þó Amríkanar hafi tekið eftir honum að sauma soddan buxur. Þegar Renault kom með fjölnotabílinn Espace sem aðrir framleiðendur hafa síðan stælt sumir með góðum árangri voru Ísslendingar að burðast við að kalla hann Espeis, þó heima í Frans heiti hann Espaas. 

Fréttamenn íslenskir er amk. flestir blessunarlega hættir að kalla Munchen Mjúnikk, þó þessi eðla borg heiti kannski Mjúnikk í munni enskumælandi, eða ítalska borgin Torino Túrín, með sömu formerkjum. Þess vegna hnykkti mér dálítið við að heyra í útvarpinu í gær að forstöðumaður amenestís internasjónals talaði um Næger -- þegar ég hélt að hún ætti við Nígeríu.

En þetta er lúmskt. Ég viðurkenni það. Man enn hvað mér kólnaði milli herðablaðanna þegar ég var að yfirfara nokkuð langa þýðingu sem ég hafði gert og uppgötvaði mér til skelfingar að ég hafði alls staðar talað um amerísku ugluna þar sem í frumtextanum hafði staðið american eagle. -- En, sem betur fer, mér tókst að lauma mér úr þessari gildru áður en hún small. 

Athugasemdir

[Hans Haraldsson (IP-tala skráð) 18.10.2009 kl. 09:46]

Er ekki líklegra að konan frá Amnesty hafi átt við Níger en Nígeríu?

[Sigurður Hreiðar, 18.10.2009 kl. 12:10]

Ekki skal ég fullyrða um það, Hans minn góður. Heyrði ekki samhengið, hjó bara eftir þessum framburði, Næger, og mundi ekki eftir neinu þvílíku úr minni landafræði.

Í sjálfu sér er aukaatriði í þessu samhengi hvert staðarheitið er. Málið snýst um hvort við eigum alltaf að taka sjálfkrafa þann framburð sem við teljum líklegastan miðað við ensku.