Dýrt að hafa góð dekk

Ekki kæmi mér á óvart þó þarna hefði sagt til sín hve dýrt er að hafa góð dekk undir bíl. Uppflot vegna bleytu verður fyrst og fremst (eingöngu?) þegar munstur dekkjanna nær ekki að hreinsa sig af vatninu og gefur því ekkert grip. Maður hefur stundum fundið þetta á dekkjum sem þó eru enn með „löglega“ munsturdýpt. Hér má þakka guði fyrir að bíllinn lenti út af en ekki á umferð á móti.

Þrír á slysadeild eftir bílveltu

Athugasemdir

[Hjalti Sigurðsson (IP-tala skráð) 14.10.2009 kl. 14:56]

Við skulum fara rólega að ákvarða eitthvað hér. Ég var að skoða flakið gaumgæfilega áðan og get fullvissað þig um að bíllinn var á MJÖG góðum heilsársdekkjum. Öll dekk hversu góð sem þau eru geta farið að fljóta , sérstaklega eins og í þessu slagveðri sem var þarna. Skulum passa okkur Á fullyrðingunum og gefum manninum sem situr stórslasaður inná spítala þá virðingu að vera ekki að bulla um eitthvað sem við vitum EKKERT um !! Takk fyrir

[Sigurður Hreiðar, 14.10.2009 kl. 15:33]

Ekki vil ég bulla eitthvað um blessaðan manninn en það sem ég var að tala um veit ég nokkuð um, þó ég hafi ekki haft aðstöðu eins og Hjalti til að skoða bílflakið á heiðinni og dekkin undir því.

Takið eftir því að ég er ekki að fullyrða neitt um þetta tiltekna atvik, segi aðeins að ekki kæmi mér á óvart -- o.s.frv. Gott þætti mér ef Hjalti og aðrir vildu láta sér nægja það sem skrifað stendur, ekki það sem hugsanlega gæti staðið.

Þetta hins vegar styrkir nokkuð þá sannfæringu mína sem ég hef töluvert haldið á lofti um dagana að heilsársdekk eru málamiðlun -- hvorki verulega góð vetrardekk né verulega góð sumardekk.

[Dóri (IP-tala skráð) 14.10.2009 kl. 16:43]

Sæll,

Svona til skemmtilegrar upplýsikngar þá er ekkert til sem heitir heilsársdekk, þetta eru allt vetrardekk.

Heilsársdekk er hugtak sem íslendingar hafa búið til fyrir að keyra á vetrardekkjum á sumrin.

kv

Dóri

[Þorsteinn H. Gunnarsson, 14.10.2009 kl. 18:24]

Það sem kemur fram í fréttinni er að grunur leiki á að bifreiðin hafi verið farinn að fljóta upp að sögn lögreglu. Slagveðursrigning var og lélegt skyggni að sögn blaðsins.

Málefnið er nauðsynlegt að ræða út frá umferðaröryggi. Hætt er við að umferðaröryggi veikist vegna kreppunnar því fólk hneigist til að aka á verri dekkjum, en heldur sama hraða og væri það á öruggum dekkjum.

Hér á Miklubraut t.d. aka menn á 80-100 km hraða í slagveðursrigningu og miklu vatni og hlífa engum. Hraðinn ætti ekki að vera meiri en 50-70 km við slíkar aðstæður.

Það er alltaf einhver ástæða fyrir svona slysum og í þessu tiltekna atviki kemur það í ljós við rannsókn. 

Ég óska fólkinu góðs bata.

[Sigurður Hreiðar, 14.10.2009 kl. 18:32]

Hvað eigum við þá að kalla það, Dóri, sem aðrar þjóðir og jafnvel dekkjaframleiðendur kalla All-season Tires?

Kannski hafa fleiri en Íslendingar tekið upp þann ósið að aka á vetrardekkjum á sumrin.

Það er rétt, Dóri, að við eigum alltaf að aka í samræmi við aðstæður, en hraðalækkun er alls ekki alltaf sú allrameinabót sem hamrað hefur á yfir okkur Íslendingum undanfarna áratugi.

[Þorsteinn H. Gunnarsson, 14.10.2009 kl. 18:46]

Það verður hver að meta það fyrir sjálfan sig, Sigurður, á hvaða hraða maður ekur í slagveðursrigningu og lélegu skyggni. Ég hleypi bara mönnum frammúr við slíkar aðstæður og held mig við öryggið og umferðalöginn, sem segja að aka skuli í samræmi við aðstæður hverju sinni.

Ég læt ekki óvita þrýsta mér upp í meiri  hraða, en sem bifreiðin og akstursskilyrðin ráða við og eigin sjón.

[Sigurður Hreiðar, 14.10.2009 kl. 18:54]

Gott hjá þér, Þorsteinn. Akkúrat það sem ég vildi sagt hafa og eins og við gerum sem betur fer langflest! Svo hvers vegna ekki að treysta dómgreind okkar?

Fyrirgefðu -- í svarinu mínu síðast ruglaðist ég á nöfnum ykkar Dóra, þekki hvorugan en það er í sjálfu sér léleg afsökun á fljótfærninni.