Gekk ég yfir sjó og land… eða bara sjó…

Gönguferðir til Tenerife

 

Þetta hér að ofan tók ég beint af tölvupósti sem ég var að fá rétt í þessu. Þetta er nú enginn smáspölur sem á að ganga að þessu sinni og mér vitanlega eru ríflega 2000 ár síðan nokkur gekk á vatni, hvað þá sjó, svo staðfest sé.

Svona auglýsing er næstum jafn umhugsunarverð og önnur álíka, að mig minnir frá sama fyrirtæki, fyrir nokkrum árum, þar sem auglýst voru laus sæti í gönguferð á Mallorka.

Hmm? Laus sæti í gönguferð?

Athugasemdir

[Hrafn Hauksson (IP-tala skráð) 20.8.2009 kl. 11:44]

Ég sé nú ekki orðið "til" í auglýsingunni - en að sjálfsögðu er það fyndnara að túlka hana þannig!

[Sigurður Hreiðar, 20.8.2009 kl. 13:25]

Sérðu ekki orðið „til“? Hvað stendur undir myndinni? Ég sé ekki betur en þar standi „Gönguferðir til Tenerife“ -- meira að segja feitletrað.

Set hér textann allan ef þú trúir þá betur, afritaðan beint:

„Gönguferðir til Tenerife

Enn sem fyrr býður Úrval Útsýn upp á heillandi og fjölbreyttar gönguferðir erlendis.

Vinsældir gönguferða hafa aukist mikið á undanförnum árum og markmið okkar er að koma til móts við ört stækkandi hóp þeirra sem vilja fara í skipulagðar gönguferðir erlendis og upplifa ferðalög á annan hátt.

Kynnum hér tvær frábærar gönguferðir til Tenerife, blómaeyjunnar vinsælu í Kanaríeyjaklasanum.
Landslagið á Tenerife er mikilfenglegt og býður upp á ógleymanlegar gönguleiðir. Uppi á sléttunni þar sem Teide, hæsta fjall eyjarinnar 3718 metrar, stendur er landslagið margbrotið og útsýnið frábært.

Hægt er að bóka ferðina í bókunarvélinni, eða fá nánari upplýsingar hjá íþróttadeild Úrvals Útsýnar í síma 585 400“

[Jens Guð, 21.8.2009 kl. 23:17]

  Mér er minnisstæður vinningur í fyrsta happdrætti Kvennalistans.  Hann var gönguferð upp á hálendi fyrir einn.  Þetta hljómaði eins og eitthvað sem maður gæti rölt án happdrættisvinnings.  Við nánari skoðun innfól vinningurinn þó sitthvað fleira sem ég man ekki hvað var.

[Jónas Þór (IP-tala skráð) 1.9.2009 kl. 21:19]

Held að þetta séu frekar tæplega 2000 ár en  "ríflega 2000 ár"