Í krafti illa fenginna atkvæða

18.8.2009 | 12:39

Í krafti illa fenginna atkvæða

Sú var tíðin að þrír piltar lásu saman til stúdentsprófs uppi í turnherbergi á húsi sem ég átti heima í um stundarsakir í Reykjavík. Einn þeirra átti heima í húsinu en hinir voru aðkomumenn. Móðir heimapiltsins kallaði þessa tvo „fóstursyni“ sína ósköp hlýlega „Frankenstein og uhyret“ en ég fékk aldrei upp úr henni hvor var hvor.

Öðrum þeirra hef ég kynnst lítilsháttar af og til á lífsleiðinni og fallið þau kynni dável. Hann er líka liðtækur skrifari og margt af því sem hann hefur skrifað og talað hef ég kunnað vel að meta.

En nú hefur piltur skitið á sig að mínum dómi og opinberlega og feimulaust tekið ófrjálsri hendi það sem hann ekki á: bunka af atkvæðum sem borgarahreyfingunni voru greidd en alls ekki honum persónulega.

Þráinn Bertelsson: ég kaus Borgarahreyfinguna á liðnu vori en alls ekki þig sem einstakling. Ég lýsi því hér með yfir að þér er óheimilt að sitja á þingi sem „óháður“ í skjóli þess kross sem ég krotaði við bókstaf Borgarahreyfingarinnar í síðustu alþingiskosningum.

Að mínu viti er enginn einstaklingur frjáls að því að helga sér þau atkvæði persónulega sem fleyttu honum inn á þing í listakosningum.

Hafðu manndóm til að skila af þér því starfi sem þú treystir þér ekki til að sinna í nafni þeirrar hreyfingar sem þú treystir þér til að bjóða þig fram fyrir.

Skrifaðu heldur eins og eina góða bók í viðbót.

Ekki sitja á þingi í krafti illa fenginna atkvæða.

Flokkur: Dægurmál | Facebook

Athugasemdir

Mikið skil ég þig vel!

Helga Guðrún Eiríksdóttir, 18.8.2009 kl. 15:16

Hefur Þráinn skrifað góða bók?

Yngvi Högnason, 18.8.2009 kl. 17:00

Já, t.d. Einskonar ég. Ég m.a.s. notað tilvitnun þaðan á titilsíðu á nýjustu bók minni.

Sigurður Hreiðar, 18.8.2009 kl. 17:51

Hvernig væri að horfa á "myndina Magnús" og hafa dálítið gaman af því sem mjög vel hefur verið gert og gefa góðu fólki alltaf möguleika, hver sem það ágæta fólk er . Þráinn Bertelsson vinnur kanski ekki eftir einhverju prógrammi fastmótaðra regla okkar allra, en gefum honum séns á þann hátt sem hann ætlar að vinna. Heldur myndi ég vilja sjá til dæmis Tryggva Þór Herbertson yfirgefa þinghúsið!