Að draga með sér skuldahalann til útlanda

Fólk sem hyggst hætta að borga af lánum sínum og ætlar að leysa vandann með því að flytja úr landi held ég viti varla hvað það er að segja. Eg veit ekki betur en vanskil flytjist með fólki nema kannski það fari til Brasilíu eða Sómalíu eða einhverra þeirra landa annarra sem hafa ekkert laga- eða viðskiptalegt samband við Ísland.

Hitt er annað mál að sumir hafa alls engin tök á að borga af lánum sínum eins og sakir standa. Þessu fólki er fyllsta vorkunn. Ekki síst vegna þeirrar arfavitlausu reglu hérlendis að þó lánveitandi gangi að því veði sem hann sjálfur við lántöku mat fullnægjandi veð og selji svo veðið, gjarnan sjálfum sér, fyrir slikk, er lántakandi eftir sem áður ábyrgur fyrir því sem eftir stendur af láninu umfram það sem fékkst fyrir veðið. Og það er allt gjaldfallið. Núna.

Ef ég hef skilið rétt eru það einmitt þeir sem í þessum sporum standa sem eiga forgangsrétt í hjálp stjórnvalda.

Það hlýtur að vera skárra að fara þá leið en stökkva frá öllu og flytja til útlanda, með þeim kostnaði og vanköntum sem því fylgir og þeim kostnaði sem fylgir því að koma sér þar fyrir, og draga með sér íslenska skuldahalann þangað.

Athugasemdir

[Ellismellruinn (IP-tala skráð) 4.5.2009 kl. 13:47]

En verðum við ekki líka að horfa til þess, að fólk er búið að bíða mánuðum saman eftir því að "skjaldborgin um málefni heimilanna" fari að virka, ekki hefur maður séð til neinna framkvæmda við þá byggingastarfsemi, nema síður sé.

[Sigurður M Grétarsson, 4.5.2009 kl. 14:38]

Skjaldborgin um fjármál heimilanna, sem stjórnvöld hafa staðið fyrir eru í flestum tilfellum aðgerðir, sem lántaki þarf að sækja um vilji hann að það gildi um sig. Þetta þarf til dæmis að gera til að fá að greiða af lánum samkvæmt greiðslujöfnunarvísitölu, fá að taka út milljón úr viðbótalífeyrissparnaði, fá frystingu lána og svo framvegis. Meðan hagsmunasamtök heimilana og aðrir eru að hrópa þessar lausnir niður þá er fullt af fólki, sem gæti haft mikið gagn af þeim, ekki að sækja um þær og missir því að því hagræði, sem því fylgir.