Víggirt lán

Það er kannski ekki von að stjórnvöld (les: fjármálavöld) vilji horfast í augu við vandann af gífurlegum húsnæðisskuldum sem eru afleiðing af efnahagshruninu í október 2008, því þetta eru sennilega einu lánin sem eru svo víggirt af lánardrottna hálfu að þau hljóta að fást meira og minna greidd, með illu ef ekki góðu. Lán til fyrirtækja og fjárglæfra eru flest glötuð og tröllum gefin.

Lán sem venjulegt fólk tók í góðri trú til að tryggja sér þak yfir höfuðið hafa meira en tvöfaldast við efnahagshrunið. Veð sem lánveitandinn tók gild eru nú ekki látin duga nema svo sem fyrir þau fæst á dauðum og verðföllnum fasteignamarkaði. Afgangurinn situr á nöfnum þeirra sem undirrituðu lánið -- lánveitandinn er stikkfrí.

Ég veit ekki um ykkur. Mér finnst þetta svívirðilegt.

Ég hef enga samúð með bílalánum eða flatskjárlánum. Væntanlega hefur verið sett veð fyrir þeim líka, sem seljandi/lánveitandi mat fullnægjandi á þeim tíma. Hirði hann sitt veð en láti skuldara í friði að öðru leyti.

 

Niðurfelling skulda óhagkvæm

Athugasemdir

[Páll A. Þorgeirsson (IP-tala skráð) 28.3.2009 kl. 18:49]

Góðar ábendingar hjá þér.

Svívirðilegt er reyndar vægt til orða tekið hjá þér.  Auðvitað er hægt að halda þessu "veruleikafirrta kerfi" sem við köllum verðtryggingu áfram en það getur aldrei endað nema með hruni og í það stefnir hjá okkur og þær aðstæður sem kreppan hafði í för með sér flýta þeirri þróun.

Hvers vegna töldu menn það algjöra fjarstæðu að verðtryggja laun á sínum tíma og bentu á að það væri gjörsamlega úr takt við alla heilbrigða skynsemi að þó svo kaffið frá Brasilíu og ýmsar aðrar innfluttar vörur hækkuðu þá ætti það ekki að fjölga "krónum í launaumslaginu", þá væri bara verið að búa til krónur sem fyrirtækin stæðu ekki undir að greiða og ekki væri verðmætasköpun á bak við í þjóðfélaginu.  "Verðtrygging" launa var afnumin með lögum og ég taldi það rétt og það sama taldi ég að ætti að gera við verðtryggingu lána enda bara sjálfvirk hækkun sem stuðlaði að óðaverðbólgu, sem sagt "prentun verðlausra peninga" eða það sem margir kalla "loftbóluseðlar".

Verðtrygging lána var á sínum tíma sett á (og þá var rætt um tímabundið) fyrir vanmáttuga pólitíkusa sem ekki réðu við "eðlilegar leiðir gegn" verðbólgu og nú telja þeir margi hana vera bestu leiðina enda losna þeir við mikla vinnu "gegn verðbólgu" því þessi er svo sjálfvirk og gulltrygg að þeirra mati   en þeir hugsa lítið út í vandamálið sem þessi leið skapar enda virkar hún bara í aðra áttina.  Hvar er sú verðmætasköpun í þjóðfélaginu sem liggur á bak við veðtryggðu krónurnar er hún ekki nákvæmlega sú sama og bent var á í sambandi við krónurnar í launaumslaginu, sem sagt "ekki til".

Við höfum orðið vör við svipaða verðmætasköpun í loftbóluleik banka og reyndar fleiri "fjármálasnillinga" víða um heim og ekki síst á Íslandi.  Þær loftbólur sprungu og eru enn að springa og ein af þeim er "verðtrygging íslensku krónunnar".  Boooommmm !!    

En ekkert er svo slæmt að ekki megi læra eitthvað af því og þau sannindi sem kreppan færir okkur varðandi "verðtryggingu" verður sennilega það besta sem hún færir okkur, "afnám verðtryggingar" eða öllu heldur stingum á þessa loftbólu strax áður en fleiri mannlegir harmleikir eiga sér stað en frá því verðtrygging var sett á hefur hún beinlínis orsakað þá nokkra.