Skjól fyrir slagveðrinu

Í landi Korpúlfsstaða langleiðina upp undir Vesturlandsvegi, þar sem Reykvíkingar leigðu um árabil skika undir kartöflugarða hefur nú verið grafin út gjóta og ofan í henni reist gríðarlegt verslunarflæmi sem tekið var í notkun á upphafsdögum kreppunnar og fékk þá nafnið Korputorg sem gárungar hafa snúið út úr og kalla Krepputorg.

Öll fyrirtæki í þessu verslunarflæmi hafa aðkomudyr til austurs sem er ein allra versta veður- og úrkomuáttin á þessu svæði en húsateiknararnir hafa annað hvort ekki gætt að því eða ákveðið að lát það ekki á sig fá og í austanveðrum er varla að rafknúnar hurðir flæmisins hafi við veðrinu og allt sem næst þeim er innandyra stendur undir ágjöf og foki ef viðskiptavinir eiga þarna leið um, sem sýnist raunar vera fremur fátítt.

Þau fyrirtæki sem af bjartsýni hafa sett sig þarna niður virðast öll hafa rúmt um sig og mikið flatarmál gólfs til að falbjóða á vörur sínar. Það er kannski þess vegna sem manni sýnist að viðskiptin séu ekki mikil og ef maður álpast þarna inn er varla annan viðskiptavin að sjá.

Eins og fyrr greinir er inngangur í öll fyrirtækin móti austri og langur vegur á milli hins syðsta og hins nyrsta. Ágæt gönguleið í góðu veðri en það getur raunar brugðið til beggja vona. Það er tilgáta mín að þessi staður nái ekki vinsældum og vexti fyrr en byggt hefur verið yfir stéttina austan undir og hún gerð að yfirbyggðum gangi -- þar sem útidyr og fyrirtækjadyr standist ekki á þannig að nokkurt skjól myndist á gangveginum fyrir austan slagveðrinu.

Athugasemdir

[Ben.Ax. (Benedikt Jóhannes Axelsson), 13.3.2009 kl. 12:52]

Sæll og velkominn. Ég gerði mér ferð á Korputorg í fyrradag og varð ég ekki fyrir mikilli geðshræringu. Það kemur mér ekki á óvart þótt Íslendingar hugsi ekki um hvaðan vindurinn blæs. Ég skil ekki af hverju matvöruverslanir eru ekki byggðar í íbúðahverfum. Ekki keyri ég marga kílómetra til að kaupa mjólk og brauð.

[HP Foss, 14.3.2009 kl. 01:00]

Það er eins með hönnuði og bankastrákana, þeir virðast koma til landsins úr námi algerlega blautir á bak við eyrun, hanna allt í tölvunni, með hríslur og sólskin á alla kanta og þegar kemur að íslensku veðri kemur í ljós að þessir kofar þeirra standast ekki áraunina, halta hvorki vatni né vindi.

Oftar en ekki er það smiðurinn á staðnum sem bendir á vanhugsaðar hugmyndir en því miður er byggingabransinn orðinn gegnsýktur af þessu helv fúski.

[zappa (IP-tala skráð) 14.3.2009 kl. 03:10]

það eina sem við klikkuðum á var að þegar við keyptum veðurstofuna.fylgdi veðrið ekki með