Hvenær er fólk miðaldra?

Nú sem oft endranær er lögð nokkur áhersla á að eldra fólk eigi að víkja úr ýmsum áhrifastöðum og ungt fólk að taka við. Hugmyndin er líklega sú að ung fólk sé óþreytt og sókndjarft; varla getur það státað af reynslu til jafns við þá sem hafa fleiri ár að baki.

Þetta kallar á spurningu um það hvað er ungt fólk. Hvenær hættir ungt fólk að vera ungt og verður miðaldra? Fólk verður tækt í félög aldraðra (sem sumir vilja heldur kalla eldri borgara, hvernig sem á því stendur) þegar það nær sextíu ára aldri. Sem hlýtur að þýða að 60 ára maður (munið að konur eru líka  menn) er aldraður. Væntanlega var hann þá miðaldra síðustu árin fram að því. Hve mörg?

Mér finnst eðlilegt að segja: 0-12 ára barn. 13-20 ára unglingur. 20-35 ára ungur maður. 35-60 ára miðaldra. Og, samkvæmt framansögðu, 60+ aldraður.

Býður einhver betur?

Athugasemdir

[Guðríður Hrefna Haraldsdóttir, 10.3.2009 kl. 15:53]

Ja, ef maður deyr 35-60 ára þá telst maður víst ungur. Þetta er nú samt nokkuð misjafnt. Í fjölskyldunni minni er maður orðinn löglega miðaldra fimmtugur og ég náði þeim merka áfanga í ágúst í fyrra. Finnst ég þvílíkt virðuleg. Ég upplifði reyndar "útskrift" um fertugt við mikið sjokk.

Annars mótmæli ég því harðlega að 60 ára manneskja sé öldruð. Þekki marga um sextugt sem skoppa um allt á göngugrindinni og sumir þeirra muna meira að segja hvaða dagur er í dag ...

[Helga R. Einarsdóttir, 10.3.2009 kl. 20:20]

Sæll frændi og velkominn heim.

Ég hef alltaf hugsað þetta út frá hundraðinu.

Og þess vegna var ég nákvæmlega miðaldra þegar ég varð fimmtug. kv. 

[Hulda Bergrós Stefánsdóttir, 10.3.2009 kl. 22:16]

sammála Helgu, annars væri ég orðin miðaldra

[Sigurður Hreiðar, 10.3.2009 kl. 22:36]

Talið við mig stelpur, þegar þið verið 100 ára.

[EE elle (IP-tala skráð) 10.3.2009 kl. 23:32]

Kannski um 50 - 55 segir ein stelpan.  Eða kannski 70!?!

[EE elle (IP-tala skráð) 11.3.2009 kl. 00:00]

En eldra fólk ætti ekki að þurfa að víkja fyrir yngra fólki.  Það er fásinna og glapræði að hæfu fólki og kannski hálærðu og með mikla þekkingu sé ýtt til hliðar bara vegna aldurs.  Og ætti að vera ólöglegt.  Get ég bætt við að aðalráðgjafi Bandaríkjaforseta er á níræðisaldri.

[gudni.is, 14.3.2009 kl. 22:09]

Skemmtilegur póll hjá þér SHH. Ég er nýlega farinn að lenda í því stöku sinnum að vera kallaður "kall". Ég er 31 árs núna og velti því fyrir mér hvenær ég fari að heyra talað um sjálfan mig sem "miðaldra kall". Þegar ég heyrði þetta "kalla" tal um mig í fyrsta sinn þá velti ég svolítið fyrir mér þessum stigum aldurs. Þ.e. stráklingur, strákur, ungur maður, maður, kall, miðaldra kall, eldri maður og svo gamalmenni eða gamall maður.  En mér er annars nokk sama hvað ég er kallaður. Ég geri bara mitt besta til þess að vera ungur og frískur í anda

En varðandi það að skipta eigi eldra fólki meira út fyrir það yngra. Ég er ekki hrifinn af slíku þó ég teljist sjálfur ennþá vera af hinum ungu og framsæknu. Ég ber mikla virðingu fyrir þeim sem eldri og lífsreyndari eru. Eldra fólk er oft skynsamara heldur en það yngra og hefur lengri reynslu af lífinu og það veit ég að skiptir mjög miklu máli.