Frumkvæði Reykvíkinga í torganöfnum

Fyrir löngu - m.a. hér á blogginu fyrir einu og hálfu ári eða þar um bil - stakk ég upp á því að hringtorgin, a.m.k. þau sem eru á Vesturlandsvegi út frá Reykjavík, fengju nöfn svo auðveldara væri að vita hvar maður væri staddur og hvað maður væri að tala um. Svona eins og örnefni voru gefin hér í eina tíð, sem voru einskonar GPS punktar síns tíma.

Eftir að ég bloggaði um þetta efni var það hent á lofti hér í sveit og komst m.a.s. svo langt fyrir einhverjum vikum að það var samþykkt hér í bæjarstjórn að beita sér fyrir samkeppni um nöfn á svona torg þar sem þau er að finna hér um slóðir.

Hvernig sem það var svo hugsað í framtíðinni. Ég hef ekki orðið var við samkeppnina enn. Lít þó annað veifið inn á mos.is.

Hins vegar uppgötvaði ég þegar ég brá mér í bæinn áðan að Reykjavíkurborg hefur gripið þessa hugmynd tveim höndum og fyrir sitt leyti hrundið henni í framkvæmd og merkt a.m.k. nokkur torg. Ég kom við í Landsbankanum í Klofningi (við hliðina á Blómavali) og hélt síðan áfram í jaðrinum á Grafarholti uns ég kom að merktu Hringtorgi Krókatorgi niður af gamla Grafarkoti. Sveigði þar til hægri og kom þá að merktu Keldnatorgi en þaðan til vinstri og kom þá á merkt Nóntorg sirka bát þar sem Gróubær var einu sinni.

Til hamingju, Reykjavík.

Héðan af verða allar nafngiftir hringtorga - sem engu að síður eru þjóðþrifamál - aðeins eftirapanir af frumkvæði Reykvíkinga.

Athugasemdir

[HP Foss, 15.12.2008 kl. 22:44]

Er ekki Melatorgið eldgamalt nafn á hringtorgi?

kv-Helgi

[Sigurður Hreiðar, 15.12.2008 kl. 22:49]

Ef Melatorgið - eða Hagatorgið - eru merkt með nöfnum sínum er það nýung.

[Smári Ólafsson (IP-tala skráð) 19.12.2008 kl. 13:04]

Ég held, en er þó ekki viss, að Hafnarfjörður sé löngu búin að merkja sín torg með nöfnum.