Kannski er ég eitthvað að dofna

Ég fékk ákúrur fyrir blogg mitt hér á undan og átti þær skilið. Ég kallaði Siv þingkonu í staðinn fyrir þingmann sem hún að sjálfsögðu er. Þetta er augljóst stílbrot hjá sjálfum mér, því ég hef áratugum saman vitað að konur eru menn engu síður en karlar eru menn.

Ég bið Siv og lesendur mína forláts.

Kannski er ég eitthvað að dofna. Það er þá í stíl við það sem er að gerast í umhverfinu. Í útvarpi allra landsmanna heyrir maður til að mynda hvað eftir annað að grunur leiki á um eitthvað og þetta er aldrei leiðrétt. Nýlega fékk ég líka auglýsingamiða hér inn um lúguna sem auglýsti sóttarpizzur á hálfvirði. Og ekki virðist þetta vera betra í skólum landsins. Frænka mín selur stundum bakkelsi og drykkjarvörur í einum af menntaskólum landsins. Hún sagði mér að nýlega hefði komið þar til hennar ung og álitsfögur skólamær, rétt henni eitthvert ílát og sagt: „Jatla fá tvær kókómjólkir og geturðu svo látt vatn í þetta fyrir mig.“ Innan sviga má geta þess að frænka er ekki ýkja hrifin af mannasiðum menntaskólanemanna sem ekki drullast til að víkja úr vegi fyrir fólki sem á erindi með klyfjar eftir göngum skólans; hvað þá að það hvarfli að þeim að rétta þessu fólki hjálparhönd svo ekki sé minnst á að opna fyrir því dyr.

Kannski lagast þetta ef við tökum upp Evru og göngum í ESB.

Lagfært skv. ábendingu kl.22.24.

Athugasemdir

[persóna, 28.10.2008 kl. 16:11]

Það þarf enginn, og nákvæmlega enginn, að skammast sín fyrir að kalla Siv þingkonu. ÉG er til dæmis blaðakona en ekki blaðamaður. Þegar ég verð þingkona vil ég láta kalla mig þingkonu en alls ekki þingkall og alls ekki herra (né perra).

[persóna, 28.10.2008 kl. 16:12]

Ef konur eru menn eru þá menn konur?

[persóna, 28.10.2008 kl. 16:13]

Gleymdi, þetta lagast kannski ef við göngum í ESB en örugglega ef við göngum í JSB (Jazzballettskóla Báru, vinkonu minnar)

[Sigurður Hreiðar, 28.10.2008 kl. 16:27]

„Ef konur eru menn eru þá menn konur?“

Svona spyr maður ekki. Allra síst ef maður er ábyrgur. En ef maður er ábyrgur þarf heldur ekki að setja það í gæsalappir.

[Eiður (IP-tala skráð) 28.10.2008 kl. 20:09]

Fyrir  fjörutíu árum fékk ég ákúrur á  fundi í Blaðamannafélagi Íslands   fyrir  að tala um blaðakonur. Það  voru  þær ágætu  konur  Elín Pálmadóttir  og Hólmfríður Gunnarsdóttir sem  gerðu réttmæta athugasemd við orðaval mitt. Þær  sögðust vera blaðamenn.  Seinna heyrði ég   Bjarna Benediktsson forsætisráðherra taka  svo  til orða í ræðustóli á  Alþingi að "samkvæmt íslenskri málvenju fornri og nýrri  væru konur menn".

Það er  svo  auðvitað hárrétt hjá þér  Sigurður  Hreiðar að þegar orðið ábyrgur er sett innan gæsalappa, þá breytist merking þess og  gefið er í   skyn að   sá  sem  um er  rætt  sé í raun alls ekki ábyrgur.

Eiður

Eiður

[persóna, 29.10.2008 kl. 11:55]

[persóna, 29.10.2008 kl. 11:55]

Engar gæsalappir um konuna í mér.

[Borat (IP-tala skráð) 29.10.2008 kl. 15:15]

Til allrar guðslukku rakst ég ekki á þessa færslu þína fyrir leiðréttingu. Hefði svo verið gæti ég hafa slasað mig við að detta af stól mínum í hneykslan. Siv er augljóslega engin þingkona.

Þarna vær bætum vel varið. Meira svona!