Kviknar í bílum af glyserínnotkun?

Á þessum dögum, þegar ævisparnaður og inneignarfé landsmanna er að brenna til ösku í veislulokum fjárgleðinnar, hafa fréttir af því að það er annað veifið að kvikna í bílum þar sem þeir bruna um höfuðborgina gersamlega fallið í skuggann.

Hvernig stendur á því að kviknar í bílum óforvarendis og þar sem þeim er ekið í mesta sakleysi? Kannski margar ástæður mögulegar. Man eftir því að ég átti 5 strokka Audi og eitt sinn er ég var nýlagður af stað fannst mér koma furðu mikil bensínlykt, svo ég nam staðar og lauk upp vélarsalnum. Þá hafði komið sprunga í bensínslöngu og runnið úr henni ofan í einskonar bolla eða skál ofan á pústgreininni, sem til allrar hamingju fyrir mig var í þetta skipti ekki orðin nógu heit.

En -- mér dettur í hug hvort þessir endurteknu eldsvoðar í bílum á ferð nú til dags geti átt samhengi við að sumir eru að reyna að spara eldsneyti með því að blanda út í það glyseríni? Er það til í dæminu?

Athugasemdir

[Helga Guðrún Eiríksdóttir, 4.10.2008 kl. 15:40]

Ekki veit ég þetta, en vinur minn einn hérna lét breyta jeppanum sínum og nú gengur hann fyrir LPG gasi, sem kostar brot af bensínverði.

Skömmu síðar var hann hækkaður í tign innan fyrirtækisins sem hann starfar hjá og þeirri stöðu fylgdi bifreið og allur rekstrarkostnaður var innifalinn. Nú er hann sem sagt að selja jeppann góða. En þá spyr ég þig, sem líklegastur ert til að vita svona lagað, -er selt LPG gas á Íslandi?

[Sigurður Hreiðar, 4.10.2008 kl. 16:25]

LPG -- veit það eitt að það stendur fyrir Liquified Petroleum Gas. Veit ekki hvort það er hið sama og notað er á gasgrill. Altént fæst það ekki úti á næstu bensínstöð. Hér fæst ekkert gas til að nota á ökutæki nema Metangas á einni stöð -- enn sem komið er.

[Helga Guðrún Eiríksdóttir, 4.10.2008 kl. 16:42]

Furðuleg pólitík að hvetja menn til sparnaðar og nýtingu á umhverfisvænni orku - og bjóða svo ekki upp á það sem til þarf þegar fólk er tilbúið að leggja sitt að mörkum.

[Sigurður Hreiðar, 4.10.2008 kl. 22:51]

Það er nú svo að það er Sorpa - ruslasamlag höfuðborgarsvæðisins - sem framleiðir metangasið en það er selt hjá Neinum (N-einum) sem skiljanlega er þá í samkeppni við það bensín og þá dísilolíu sem er þeirra megin lífsblóð. Metangasbílar seljast lítið vegna þess hve óvíða er hægt að kaupa metanið og metanið fæst svona óvíða vegna þess hve fáir bílar geta gengið fyrir metani.

Er þetta ekki kallað vítahringur? Kannski heimatilbúinn, en vítahringur samt…