Miðaldra kona í framboði vestra

Kona sem myndi heita Sara Pálína ef nafnið hennar væri hljóðþýtt á íslensku er nú í framboði til varaforseta í Bandaríkjunum og nokkuð heit með að hljóta þá tign. Hún er 44 ára.

Æskudýrkun Vesturlanda kallar hana unga konu. Ég tel að hún sé miðaldra.

Engu lakari fyrir það og vafalaust hinn besti kvenkostur.

Um þetta er ugglaust deilt. En að mínu viti er 35 ára gamalt fólk ekki ungt fólk lengur. Það er miðaldra.

Þegar Íslendingar verða 60 ára teljast þeir hæfir í samfélag aldraðra. Eða eldri borgara hjá þeim sem ekki vilja kannast við að vera farnir að reskjast.

Hvað erum við? Börn fram að tvítugu? Ung fram til 35 ára? Miðaldra til sextugs? Gömul (öldruð, eldri borgarar) úr því?

Þannig finnst mér þetta vera í grófum dráttum. En Sara Pálína getur engan veginn talist ung kona.

Athugasemdir

[Sigga (IP-tala skráð) 3.9.2008 kl. 16:13]

Ég myndi nú kannski ekki telja hana unga konu en hún er ungur stjórnmálamaður og ungur fylkisstjóri. Stjórnmálamenn eldast svo hægt, tekur þá miklu lengri tíma en aðra.

[Gunnfríður Elín Hreiðarsdóttir, 3.9.2008 kl. 16:13]

Sæll frændi og takk fyrir síðast

Ég verð nú að mótmæla harðlega, þar sem ég nálgast 35 ára aldurinn óðfluga en tel mig þó vera kornunga konu og ætla mér að vera það eitthvað áfram og að minnstakosti meira en 3 ár í viðbót

Kveðja úr Bændahöllinni

Gunnfríður jr.

[Hulda Bergrós Stefánsdóttir, 3.9.2008 kl. 16:42]

Miðaladra kona sendir þér kveðjur, eða ekki fyrir að hafa mig MIÐALDRA

[GHr. senior (IP-tala skráð) 3.9.2008 kl. 17:09]

Þakka fyrir síðast.  Þú gleymir einu, á hvaða aldri viltu láta  fólk vera þegar það telst roskið?  Kv.  G.Hr senior

[Helga Guðrún Eiríksdóttir, 3.9.2008 kl. 17:35]

Fullt af aldursorðum ótalið, auk koskinn. Má þar nefna framorðinn, hrukkudýr, SHEGD (Skyld´annEkkiGetaDáið)...

[Helga Guðrún Eiríksdóttir, 3.9.2008 kl. 17:35]

auk roskinn... átti þarna vitaskuld að standa...

[Sigurður Hreiðar, 3.9.2008 kl. 19:18]

Takk sjálf fyrir síðast, gaman að hitta þig aðeins þó stutt væri.

En -- þú verður að bíta í það súra epli að nálgast miðaldurinn óðfluga, hvort sem þér líkar betur eða verr. 35 ára kona er að öllum líkindum búin með tvo þriðju hluta af barneignaskeiði sínu. Árin eru viss mælikvarði og í sjálfu sér það eina sem við höfum „áþreifanlegt“ að fara eftir þegar við tölum um aldursskeið. Hið óáþreifanlega er svo allt annar hlutur -- þannig séð finnst mér ég ekki vera hótinu eldri en þú.

Samkvæmt orðabókinni er fólk roskið um eða upp úr sextugt. Ætli það sé þá ekki farið að reskjast upp úr fimmtugu?

Hvar viljið þið æskudýrkendur eiginlega draga mörkin fyrir „miðaldra“? Ef við erum gömul 60 ára en ung ennþá 45 ára, hvar kemur þá miðaldurinn og er hann eitthvert örstutt tímabil?

Mínar kæru miðaldra vinkonur (sem hélduð þar til í dag að þið væruð ungar) ég óska ykkur innilega til hamingju með miðaldurinn. Þar blómstrið þið.

[Helga Guðrún Eiríksdóttir, 3.9.2008 kl. 21:06]

Mér finnst yndislegt að vera miðaldra. Reyndar hafa mér þótt öll æviskeiðin vera ótrúlega skemmtileg hvert um sig. Ég hlakka líka mikið til ef mér auðnast að ná því að verða eldri borgari. Fullorðin börn og barnabörn, mmm get ekki beðið!

[Sigurður Hreiðar, 3.9.2008 kl. 21:20]

Reyndar blómstrið þið líka sem eldri borgarar!

[Guðríður Hrefna Haraldsdóttir, 3.9.2008 kl. 23:45]

Hjartanlega, innilega ósammála, elsku karlinn minn. Tel mig hafa orðið loksins löglega og almennilega miðaldra þegar ég varð fimmtug.

Að 35 ára kona teljist miðaldra ... onei. Ef ég dey á morgun þá mun Mogginn fyllast (vonandi) af minningargreinum um það hversu ung ég hafi verið þegar ég dó ... en það er líklega eini möguleiki minn til að kallast ung úr þessu nema ég velti mér upp úr því hvað ég sé ung miðað við áttræða konu. Þeir sem "þjást" af æskudýrkun eru frekar þeir sem reyna að kalla 35 ára fólk miðaldra og finnst ekki hægt að treysta neinum yfir 30 ára. Sættist á 45 plús sem miðaldra til að halda friðinn og vík ekki kommu frá því.

[Sigurður Hreiðar, 4.9.2008 kl. 09:47]

Jæja, Gurrí mín, til hamingju með að hafa ekki orðið miðaldra fyrr en þú varst komin úr barneign. En ég yrði sammála Mogganum um að ef þú dæir á morgun hefðir þú dáið allt of ung -- og það sama finnst mér um marga þér eldri sem hafa hlotið þess konar örlög.

[Guðríður Hrefna Haraldsdóttir, 4.9.2008 kl. 13:05]

Man eftir konu sem eignaðist barn 54 ára ... minnir að hún sé sendiherra.  Engu að treysta í þessum heimi.

[Sigurður Hreiðar, 4.9.2008 kl. 13:54]

Ýmislegt má nú gera með fræðilegri hjálp og góðra lækna milligöngu, jafnvel fyrir konur sem ekki eru lengur í barneign. -- Sigríður Snævarr er ekki lengur sendiherra og sneri sér ekki að barneignum fyrr en því tímabili lauk. Hún mun vera elsta kona íslensk sem alið hefur barn, en erlendis hefur enn eldri konum einnig verið hjálpað til þess þó aldurslega sé barneignatímabil þeirra löngu að baki.