Hvar er nú seifing Æsland?

Skólar eru að hefjast. Sum börn eru að hefja skólagöngu sína, önnur eru að fara í skólann aftur -- eftir sumarfrí.

Núna í vikunni datt litprentaður bæklingur úr dagblaðabunkanum sem ég hirti upp af forstofugólfinu.

Fyrirsögn hans: Back to school. Hann reyndist vera frá versluninni name.it. Hann auglýsti skólafatnað handa börnum. Íslenskum, skyldi ég halda, a.m.k. var honum dreift á Íslandi.

Inni í honum var annar minni bæklingur heftur, líka frá name.it. Aftan á honum stóð: Thank you for buying with your head and your heart.

Ég segi nú bara: Guð minn almáttugur! Er andi Megasar og Toyota farinn að smæla framan í skólaæskuna líka?

Hvar er nú Seifing Æsland?

Athugasemdir

[Björn Gunnarsson (IP-tala skráð) 22.8.2008 kl. 20:22]

Sammála.

Sérstaklega verð ég að taka undir, hvað auglýsing Toyota á Ísland. "Smælaðu framan í heiminn" er hallærisleg.

Toyota -  Tákn um gæði, þótti nú flott hérna áður. Nú eru gæðin kannski víðsfjarri?

[Þorsteinn Briem, 22.8.2008 kl. 20:42]

Tveggja ára gamall, löngu áður en hann lærði að lesa, benti sonur minn á alla Toyota-bíla sem hann sá og sagði "Toyota, tákn um gæði!"

Hann þekkti þá einnig allar aðrar bílategundir en þær voru bara Volvo, Ford, Volkswagen og svo framvegis.

[Edda (IP-tala skráð) 23.8.2008 kl. 01:14]

Algjörlega sammála - og þetta #x##x# "smælaðu" fer alveg gífurlega í taugarnar á mér... og ég tuða yfir því í hvert einasta skipti!!!

[Eiður (IP-tala skráð) 23.8.2008 kl. 15:01]

Það gleður  að  fleiri  skuli  gera  athugasemdir  við þessa ömurlegu  Toyota-auglýsingu. Það er eins og  sumum bílaumboðum sé  ekki sjálfrátt. Þau hafa vondar  auglýsingastofur. Nú  auglýsir Ingvar Helgason "Bílaoutlet" . Það er ekki betra  en  Toyota "smælið",  sem  þeir Toyotamenn réttlæta með Megasi og því að hann hafi  fengið verðlaun á  degi íslenskrar   tungu.

Sem aldrei  skyldi verið hafa, segja sumir.