Lífdísill fyrir 65 krónur lítrinn

Vonandi gengur þetta allt vel. En man nokkur eftir kjötmjölsverksmiðjunni sem reist var í Flóanum og átti ma. að nýta til fullnustu allskonar sláturúrgang sem annars var bara urðaður með tilheyrandi mengun og umhverfisspjöllum?

Hvað varð um hana?

Það eru fleiri á þeim buxunum en Líforka að framleiða eldsneyti. Ameríkani að nafni Floyd Butterfield hefur í samvinnu við landa sinn Thomas Quinn búið til maskínu á stærð við sturtuklefa sem hver og einn á að geta keypt og sett upp heima hjá sér til að framleiða etanól á bílinn. (Quinn þessi mun hafa fundið upp og þróað hreyfiskynjarana sem notaðir eru í Nintento tölvurnar og á því nokkuð undir sér.) Efnið sem maður fóðrar etanólmaskínu þeirra Quinns og Smjörakurs með til að fá eldsneytið er sykur og vatn, fyrir utan einhvers konar hvata sem þeir hafa fundið upp og búa til sjálfir og maður verður að kaupa frá þeim. En með þessu móti, og með því að nota úrgangssykur sem enginn vill éta og er sagður fást á góðu verði hjá sykurframleiðendum kvað lítrinn af etanólinu kosta um það bil 20 krónur.

Þeir hjá Líforku ættu líka að rabba við Green Fuels í Stóra-Bretlandi sem framleiðir svokallaðan Fuelpod handa almenningi til að framleiða lífdísil ma. úr notaðri steikarfeiti/mataraolíu. Sögunni fylgir að ef maður verði að kaupa úrgangsolíuna sé lítraverðið á eldsneytinu fulltilbúnu um 65 krónur, en ef maður getur sótt n óg af henni í eigin eldhús dettur þessi tala niður í um 25 krónur.

Frá þessu er sagt í netútgáfunni af auto motor och sport í dag.

Fita endurnýtt sem eldsneyti

Athugasemdir

[Geir Guðmundsson (IP-tala skráð) 10.7.2008 kl. 16:03]

Kjötmjölsverksmiðjan hætti þegar grunur vaknaði um að kjötmjöl gæti valdið kúariðu sem aftur gæti valdið kreutsfelt-Jacob sjúkdómi í mönnum ef menn borða kjöt af nautgrip sem hefur haft kúariðu á frumstigi. 

Hluti af afurðum kjötmjölsverksmiðjunnar var lífdísill sem unnin var úr dýrafitu. Sú framleiðsla var aðeins hliðaraðfurð og lagðist af með lokun verksmiðjunnar. Mér skilst að sláturúrgangur sé urðaður í dag.

Samstarfsmenn mínir á Nýsköpunarmiðstöð (þá Iðntæknistofnun) tóku þátt í að þróa lífdísil- framleiðsluna hjá kjötmjölsverksmiðjunni.

[Sigurður Hreiðar, 10.7.2008 kl. 16:15]

Takk fyrir þetta, Geir.

Það sem ég átti við var að með Kjötmjölsverksmiðjunni var farið af stað með hugmynd sem í sjálfu sér var kannski góð en ekki hugsuð til enda í tæka tíð.

[Geir Guðmundsson (IP-tala skráð) 10.7.2008 kl. 18:22]

Já í upphafi skyldi endinn skoða.  Skýrslan um lífdísel framleiðsluna er aðgengileg á netinu fyrir þá sem vilja kynna sér frekar þessa möguleika, að framleiða lífdísel úr afgangsfitu frá matvælafyrirtækjum.  Niðurstaða er að steikingarfeiti frá matsölustöðum er handónýt, og ef maður veit ástæðuna, þá hættir maður alveg að borða á íslenskum matsölustöðum.   

http://www.nmi.is/files/Lokaskyrsla_lifdisill_1874651780.pdf

[Stefán Ásgrímsson (IP-tala skráð) 11.7.2008 kl. 05:46]

Blessaður Sigurður. Á vefslóðinni sem hér fylgir er lýst í mjög grófum dráttum aðferð við að framleiða m.a. hráolíu í stórum stíl úr hverskonar lífrænum úrgangi, þar á meðal klóaki. Efnafræðingurinn sem á einkaleyfi á aðferðinni segir að þetta sé í raun sama aðferð og náttúran sjálf beitir, nema í stað þess að vera nokkrar milljónir ára að því gerir tæknin mögulegt að klára þetta á fáeinum mínútum. Kannski er hið háa olíuverð blessun eftir alltsaman. Í það minnsta hefur aldrei áður í bílasögunni verið jafn mikið leitað að öðrum orkugjöfum fyrir samgöngur en jarðolíu og árangur orðið jafn mikill og um þessar mundir. En hér er slóðin:   http://www.scf-technologies.com/default.asp?id=133

[Jóhann Zoëga (IP-tala skráð) 11.7.2008 kl. 09:44]

Þetta fer að verða eins og stálframleiðslan hjá Maó hér um árið.  Hver bóndi sitt heimastálver.  Vonandi lukkast þetta betur. 

Jóhann Zoëga

Norðfirði.

[Gunnar Ingi Stórfrændi (IP-tala skráð) 11.7.2008 kl. 11:24]

Ég er ekki viss um að ég myndi fúlsa við því að borga 65 krónur fyrir eldsneytislíter. Það færi langt fyrir fátækan námsmann að spara þessar rúmar 100 krónur á hvern líter yfir veturmánuðina.Tala nú ekki um ef að ég gæti nú bara skellt þessu á litlu vespuna mína og er nú býsna ódýrt að reka það tryllitækið.

Það sem mér finnst nú skondnast við þetta er að mig rámar í frétt þar sem menn hefðu verið handteknir fyrir að ræna notaðri steikingarolíu í Kanalandi. Mér tókst samt nú ekki að finna þessa grein í safni mbl.is en þykist vera nokkuð viss í minni sök.

Annars bið ég bara að heilsa suður yfir heiðar, frændi.