Íslenskar konur eru miklir skorungar!

Þó að orðið „skörungur" sé karlkyns og orðabókin skilgreini það einkum upp á karlkynið, er þar þó einnig að finna merkinguna „atkvæðamikill karl eða kona". Svo mikið er víst að ef virkilega sópaði að konum þótti við hæfi að kalla þær skörunga, jafnvel kvenskörunga ef miklar karlrembur tóku sér orðið í munn.

Nú legg ég til að ö-inu verði breytt í o og konur þar sem virkilega sópar að verði nefndar „skorungar". Ég kann ekki að horfa á fótbolta en glappaðist til þess í dag að byrja að horfa á „stelpurnar okkar" bursta þær grísku og skora hvert markið á fætur öðru. Ég hreinlega hætti ekki að horfa fyrr en RUV brast á með auglýsingar.

Sannfærðist um að enn sem fyrr er sópar að íslenskum konum þar sem þær gera sig gildandi. Þær eru miklir skorungar!

Athugasemdir

[Anna Ólafsdóttir Björnsson, 26.6.2008 kl. 23:23]

Flott nýyrði, ekki það eina úr þínum fórum en skemmtileg tenging við gamla orðið og auk þess passar það einstaklega vel sem url fyrir kvennalandsliðið: www.skorungar.is ... má lesa á tvo vegu.

[Hilmir Arnarson, 27.6.2008 kl. 12:21]

Mér líst geisivel á orðið og ætla að grípa hvert tækifæri sem ég fæ til að kalla aðsópsmiklar konur, "skorunga".  Takk.

[Hulda Bergrós Stefánsdóttir, 27.6.2008 kl. 14:52]

Má líka lesa ungar konur með skoru !!!!!

[Aðalheiður Ámundadóttir, 27.6.2008 kl. 16:33]

Mitt æðsta markmið í lífinu verður héðan í frá að fá mín getið sem 'skorungur mikill' í Íslenskum samtímamönnum...