Leiðinda villa í brúm að baki

Fyrir menn eins og mig sem hafa sérstakan áhuga á sögu samgangna á Íslandi -- einkum samgangna á landi -- er sérstakur fengur að bók eins og Brýr að baki, sem Verkfræðingafélag Íslands gaf út árið 2006.

Þar er sagt frá sögu íslenskra brúa svo langt aftur sem sögur herma og skreytt með mörgum myndum.

Að langmestu leyti er bókin (það sem ég hef þegar lesið af henni) áhugaverð, fróðleg og læsilega skrifuð.

Eins og vænta má í svona riti og sennilega er aldrei hægt að komast hjá að inn slæðist villur sem er slæmt, því það er þar með orðið stafur á bók og vísindi sem vitnandi er í.

Því miður er leiðinda villa í myndatexta á bls. 197. Þar er minnst á Thomsensbílinn, fyrsta bíl sem kom til Íslands. Það var árið 1904 svo sem kunnugt er, en í myndatextanum staðhæft að hann hafi verið „seldur úr landi ári síðar“ sem er rangt. Í bókinni Saga bílsins á Íslandi 1903-2004 kemur fram og vitnað í öruggar heimildir að hann var ekki seldur utan aftur fyrr en árið 1908. Hann var meira að segja notaður eitthvað hérlendis sumarið 1905 og þá var ökumaður hans Tómas Jónsson sem síðar varð kjötkaupmaður á Laugavegi 2.

Tilvist Thomsensbílsins hér fram yfir árið 1905 og lengur kemur raunar fram víðar í ritum en þeim mun hryggilegri og engu síður bagaleg þessi staðhæfing í jafn merkri bók og að því er virðist um flest vandaðri og Brúm að baki.

Athugasemdir

[Helga R. Einarsdóttir, 12.5.2008 kl. 19:11]

Ekki vænti ég að þú hafir rekist á eftirfarandi vísu í bókinni?

Nú er brúin búin, bjöguð skökk og snúin,

dvergasmíði dánumanns.

Stólpar voru steyptir, stöplar niður greyptir,

alla leið til andskotans. 

Ég lærði þetta líklega þriggja eða fjögurra ára gömul.   Ég man fleiri kjarnyrtar vísur frá þeim tíma og er næsta viss um að menn hafi gert sér til gamans að kenna mér þennan kveðskap vegna þeirra orða.     Ég get alveg skilið að það hafi verið gaman að heyra skýrmælt smábarn fara með svona kveðskap. Eins og þú veist var ég ekki alin upp til þess að blóta og hef haldið nokkuð í það, svo tengdabörnum þykir sumum nóg um.

Mig grunar að vísan sé til orðin í tilefni vígslu Ölfusárbrúar hinnar fyrri, en er þó ekki viss. Og ekki er ég heldur svo viss um höfundinn að ég þori að nefna.  Veit einhver meira en ég? kv.

[Sigurður Hreiðar, 13.5.2008 kl. 14:53]

Nei, Helga, þessa vísu hef ég hvorki heyrt né séð.

Kv. í bæinn