Vegir þaktir með eftirrétti

Ég ólst upp við þann málskilning að krap væri vatnsblandaður snjór en krapi væri eftirréttur búinn til úr frystum ávaxtasafa eða einhverju þvílíku -- þynnri ábætisís en rjómaís.

Nú lenda ferðalangar í kröppum dansi þegar vegirnir eru þaktir með svona eftirrétti.

Það versta er að orðabókin samþykkir þá breytingu sem orðin er á merkingu þessara orða.

Kannski verður þá gamall hundur að læra að sitja, hvort sem honum líkar betur eða verr.

Það er svo margt sem breytist í málfari sem öðru. Ekki er langt síðan ég ætlaði að ganga tiltekinn göngustíg en kom þá að skilti sem á stóð: Lokað vegna lagningu XX-brautar.

Mig rak í rogastans. Lagningu? Ekki vegna lagningar?

Hvað segja nú málvitringar? Eigum við að hafa lokað vegna lagningu vegar, eða ófært af völdum eftirréttar?

Árekstur í krapa og snjó

Athugasemdir

[Sæmundur Bjarnason, 5.5.2008 kl. 10:42]

Enginn er ég málvitringur, en sammála þér um lagninguna. Konur fóru í lagningu og gera kannski enn, en fráleitt vegir. Hins vegar er minn skilningur á krapinu ekki sá sami og þinn. Í mínum huga eru krapi og krap eiginlega það sama. Nafnið á eftirréttinn hefur eflaust verið líking og kannski öðlast fasta merkingu í sumum hópum en ekki öllum. Varla væri þó hægt að nefna eftirréttinn krap.

[Ruth Fjeldsted (IP-tala skráð) 5.5.2008 kl. 16:29]

 Hér er krap     krapið

 um krap          krapið

 frá krapi         krapinu

 til kraps         krapsins

Þetta krap er hvorugkynsorð og táknar sambland af snjó og vatni. Snjórinn hefur ekki þiðnað þó saman við vatnið sé kominn og vatnið hefur ekki frosið þó í það hafi bæst eitthvert magn af snjó. Þetta á sér væntanlega eðlisfræðilega skýringu

Hér er krapi    krapinn

um krapa        krapann

frá krapa        krapanum

til krapa        krapans

Þessi krapi er karlkynsorð og táknar umræddan eftirrétt.

Svo geta menn leikið sér með fleirtölur þessara skemmtilegu orða!

Bestu kveðjur

Ruth Fjeldsted

[Helga Guðrún Eiríksdóttir, 5.5.2008 kl. 21:32]

Eins gott að stafurinn c er hér ekki mikið á flakki, það yrði total crap..  En grínlaust þá þekki ég frá bernsku bæði orðin krap og krapa notaðan um sama "hlutinn", þ.e. blautan snjó. Stundum er talað um krapadrullu á veginum, þar með er það trúlega tregið af krapa en ekki krapi, ellegar væri það krapdrulla. Svo þetta stingur ekkert í mín augu. Hins vegar segi ég líkt og Sæmundur með lagninguna, götustelpa gæti farið í lagningu en tæpast gatan. Er annars munur á vegi og götu..?

Þess má einnig geta að Krapi er algengt nafn á gráum (krapalituðum) hestum og og oft er talað um krapalitaðar jökulár. Þetta nafn á eftirréttinum heyrði ég ekki fyrr en á efri árum. Ég er fjarri því að vera fræðingur í íslensku og er þar jafn villugjörn og annars staðar en mér finnst gaman að leika mér að henni og með hana og bý mér til jafnvel til orð og orðskrípi ef tilefnið leyfir og lundin létt.  En fátt þykir mér fegurra í heiminum en vel skrifuð/mælt íslenska.

[Sigurður Hreiðar, 5.5.2008 kl. 21:44]

Það hefur löngum þótt sómi að því að vera karl í krapinu.

En ætli það sé nokkuð varið í að vera karl í krapanum?

[Helga Guðrún Eiríksdóttir, 6.5.2008 kl. 12:17]

Þetta er sennilega bara eitt af þessum orðum.. eins og skrítið. Mér þótti það alltaf skrítið að það væri jafnrétt að skrifa það með í og ý, en þar valdi ég einfaldleikann.