Liðstýring?

Um hver jól svo lengi sem ég man hefur Morgunblaðið fært okkur verðlaunakrossgátu og verðlaunamyndgátu. Krossgátan hefur jafnan eins og flestar aðra krossgátur verið auðleyst en ég hef verið fremur glámskyggn á myndmálið. Þó fór svo nú að ég réði gátuna, þrátt fyrir að þar er á einum stað gefinn um stafurinn M þar sem á að vera I.

En svo vó Fréttablaðið (sem hefur skilað sér nokkuð vel hingað það sem af er vetri) í sama knérunn og kom með verðlaunamyndagátu líka. Sem var að flestu leyti auðleyst - nema eitt undarlegt myndmerki. Það er fótur, beygður um hné, og á hnéð hafa verið bróderaðir sex punktar og fálmarar út úr - gjörsamlega óskiljanlegt tákn. Hver hefur séð svona búnað á hné? Og hvað heitir þetta? Er þetta einhvers konar liðstýring?

Þetta þýðir að maður verður að fletta Fréttablaðinu nokkuð rólega vikuna eftir 15. janúar, en þá rennur út skilafrestur fyrir þá sem skilja þetta furðulega tákn! Því það verður nokkurn veginn ómissandi að fá einhverja skýringu á þessum hnébúnaði og til hvers hann er hafður.

Athugasemdir

[Óli Garðars, 7.1.2008 kl. 14:17]

Táknið þýðir: "Reim á lið", sem breytist svo í "REI málið"

[Sigurður Hreiðar, 7.1.2008 kl. 17:16]

Ja hérna -- langsótt er atarna, en bestu þakkir Óli Garðars.

Sjálfherðandi reimar sem standa upp í loftið -- öll reimagötin sömu megin og svo rís reimin lengra frá eins og af sjálfu sér upp í ljósvakann!

En snillingur ertu, Óli. Minnstu okkar hinna treggáfuðu þegar þú flýgur á verðskulduðum gátulaunum eitthvað út í buskann með Ísland í einum grænum (=Iceland Express)!

[Guðrún J (IP-tala skráð) 7.1.2008 kl. 22:36]

Takk fyrir upplýsingarnar. Gott að fá úr málinu leyst.  Reim á lið - það var sniðugt! Ekki datt mér það í hug. Teiknarinn hefði nú átt að láta reimarnar lafa niður en ekki rísa upp í ljósvakann eins og þú orðar svo skemmtilega, Sigurður.

Á mínum slóðum hafði fólki dottið í hug annars vegar að teikningin ætti að sýna liðhlaup (þ.e. Björn Ingi - teikningin sýndi einhverskonar skrið í lið!) og hins vegar útrás sbr. blóðrás en hér streymdi blóðið út! Mér fannst hvortveggja alveg geta "meikað sens".
Gaman að þessum pælingum. Ég vona að Óli Garðars sendi inn lausn.