Hugleiðing daginn fyrir aðfaranótt nýársdags

Nú fer í hönd sú stund ársins þegar árarnir halda sitt árvissa mót. Sú stund heitir áramót.

Dagana á undan hafa jólatré verið látin skemmta sér. Það er kallað jólatrésskemmtanir.

Dagana á eftir verður kveikt í álfum. Það heita álfabrennur.

Eitthvað á þessa leið verða ugglaust orðaskýringar eftir fáein ár. Eftir því sem tengslin við upphafið dofna. Eins og börnin kváðu vera látin gera í hreyfingum með barnagælunni „Nú skal segja". Þar eru gamlir karlar látnir taka í nefið. Sem betur fer þekkist það varla lengur að fólk, þar með gamlir karlar, súpi tóbak í nefið, en það hét að taka í nefið. Og þess vegna eru börnin á leikskólunum einfaldlega látin taka fast á nefinu á sér -- taka í nefið eins og það handfang sem það í rauninni er.

Gamall skilningur og gömul heiti eru svona jafnt og þétt að breytast. Menn þekkja ekki gömlu handverkfærin lengur af því þau eru í rauninni aflögð. Eins og Ruth benti mér á í athugasemd við síðasta blogg mitt. Fólk réðist inn á Stefán í Litlu kaffistofunni og ætlaði að berja hann með bareflum. En kom ekki að tómum kofunum því hann greip skóflu og mokaði pakkinu út. Talað var um stunguskóflu í þessu samhengi en birt mynd af malarskóflu. Set hér í heild athugasemd Ruthar, hún er alveg þess virði:

„Baggalútur er landsmönnum að góðu kunnugur"!

Jólanótt og nýársnótt eiga undir högg að sækja: Sjónvarp allra landsmanna auglýsir Menningarnæturtónleika á „gamlársnótt".

Kona nokkur þurfti að bíða í nokkra mánuði eftir að fá gert við holu. ( Var holan biluð?)

Fyrir skömmu réðust ógæfumenn inn í Litlu Kaffistofuna. Eigandi hennar varðist með stunguskóflu að sögn blaðanna. Í einu blaðinu var svo birt mynd með fréttinni af vígreifum manni með malarskóflu.“

Við þetta má því bæta að nú heyrir maður iðulega og sér talað um „gamlAársnótt". Og í útvarpi heyrðist nú um jólin talað um „aðfaranótt jóladags".

Allt um það: með þessum pistli þakka ég fyrir samskiptin við lesendur mína og viðmælendur. Megi þessi stund verða þeim þægileg og ánægjuleg. Og ef þið eruð svo meyr að fara að strengja áramótaheit - fyrir alla muni hafið það þá eitthvað sem hægt er að standa við!

Hittumst heil á nýju ár (eftir aðfaranótt nýársdags).

 

Athugasemdir

[Hulda Bergrós Stefánsdóttir, 31.12.2007 kl. 12:22]

Gleðilegt ár

Þakka færslunar sem koma manni til að hugsa og jafnframt "bloggvináttu" á líðandi ári.

[gudni.is, 31.12.2007 kl. 12:39]

Það er sem fyrr gaman að lesa skrif þín Sigurður. Þau fá mig oft til að brosa breitt og hugleiða svolítið ýmislegt í mannlegum samskiptum okkar mannskepnunnar...

Ég þakka innilega ánægjulega bloggvináttu á liðnu ári. Ég óska þér og fjölskyldu þinni farsældar á komandi ári.

Mosókveðja,
Guðni

[Gunný (IP-tala skráð) 31.12.2007 kl. 12:51]

 Opnaði Fr.blaðið í morgunn og rak þar augun í að einhver boltapiltur væri "alfarið kominn heim"?? Æiii.   Ákvað svo í tilefni dags að það væri frekar ástæða til að gleðjast með honum yfir að vera alkominn heim.  Nú þori ég varla að nefna ára-mót svo ég sendi bara mínar bestu óskir um ánægjulegan tíma þegar nýja árið tekur við af því gamla. Kveðjur

[Ásgeir Eiríksson, 31.12.2007 kl. 13:18]

Gleðilegt ár! Takk fyrir skemmtilega pistla hér á blogginu.

[Meinhornið, 31.12.2007 kl. 15:23]

Og fyrr í desember fóru menn á jólaböll. Hvaða jólaböllur er þetta, og er þetta ekki hálf klúrt athæfi?

[Helga R. Einarsdóttir, 31.12.2007 kl. 15:54]

Takk fyrir  árið sem er að kveðja frændi sæll. Það er varla að maður þori að tjá sig hér um það sem var eða þá hitt sem er á næstu grösum. Ég hef aldrei heitið nokkrum sköpuðum hlut, hvorki á þessum tímamótum eða öðrum og ætla ekki að fara að taka uppá því núna.

Vonandi verður árið 2008 gott fyrir þig og alla þína, bestu kveðjur frá mér og mínum.