Hægt af stað

Allt fer þetta hægt af stað og manni er sagt að þetta verði aðeins notað í undantekningatilvikum, þegar slys hafi orðið eða annað þar sem þetta geti flýtt fyrir því að hægt sé að koma til hjálpar.

Allt fer sosum sakleysislega af stað. Svo var líka þegar bankarnir fóru að veita húsnæðislán fyrir -- hvað, fimm árum? -- og umræðan var hávær um að leggja Íbúðalánasjóð niður, hann (ríkið) ætti ekki að vera að vasast í því sem einkaframtakið gerði fullt eins vel eða miklu betur. En bankarnir gátu ekki beðið eftir því að Íbúðalánasjóður yrði lagður niður heldur hertu kverkatakið við fyrsta tækifæri, enda búið að hálfgelda Íbúðalánasjóð.

Upplýsingar úr hugbúnaði í bílum? „Við erum hér, hvar ert þú?“ verður þá óþörf spurning. Eftir skamman tíma verður eftirlitið orðið algjört. Hvaða erindi átt þú þangað sem þú ert að fara? Hver er með þér í bílnum /hverjir? Hversu hratt ekur þú? Gerir þú allt nákvæmlega eins og þú átt að gera? Ekki það? Þá skal refsa og það rækilega því allt er glæpur sem upp kemst, jafnvel ímyndaður glæpur eins og að fara yfir lögleyfðan hámarkshraða við bestu aðstæður.

Því þá verður nefnilega búið að segja gjöriði svo vel.

Stórmál að fylgjast með ferðum

Athugasemdir

[RangeRover (IP-tala skráð) 15.11.2007 kl. 09:59]

Þegar nú við bætist það fáránlega fyrirkomulag að lögreglumenn í tilteknu umdæmi hérlendis sem er orðið þekkt fyrir virkni í innheimtu umferðarsekta, hafa persónulegan hag af sektainnheimtunni! En eftir að farið var að sekta fólk fyrir að aka á 94 km/klst. þar sem hámarkshraði er 90 km/klst. þá þykir manni sem það sé farið að nota hraðasektir sem tekjulind. Held að það hafi ákaflega lítil áhrif á ofsaakstur ef venjulegt fólk er sektað fyrir svonalagað. En þetta er orðið býsna algengt eftir að sjálfvirku eftirlitsmyndavélarnar komu til skjalanna. En eins og þú bendir á, Sigurður, þá er þetta lúmsk aðferð til að smeygja svona algjöru eftirliti inn í þjóðlífið. Nóg er nú samt eftir að GSM-símarnir og greiðslukortin komu til sögu sem eftirlitstæki með sauðsvörtum almúganum.

[Anna Ólafsdóttir Björnsson, 15.11.2007 kl. 12:35]

Mikið rosalega er ég sammála þér, Sigurður, að það sem fer kannski sakleysislega af stað getur komið í bakið á manni. Og að ætla að fara að vakta ferðir fólks á þennan hátt er auðvitað óhugnanlegt. Nóg samt, eins og fleiri eru að benda á.