Gustar enn í glasinu

Um daginn skrifað ég um storm í vatnsglasi. Það er ég ætlaði að benda á var að mál sem í  rauninni var ekki stórmál, sameining tveggja hlutafélaga, varð að stórviðri af því að móðurfyrirtæki hlutafélaganna er í almannaeign og þess var ekki gætt að allir litlu kóngarnir og allar litlu drottningarnar fengju að vera memm og geta látið líta svo út sem þau hefðu verið eitthvert númer í leiknum.

Nú hefur heldur betur komið á daginn að ég hafði rétt fyrir mér. Allir litlu kóngarnir og allar litlu drottningarnar eru búnar að sprengja sápukúluna. Nýju setti af litlum kóngum og litlum drottningum hefur verið stillt upp á taflborðið og gamla settið orðið að peðum. Og situr uppi með að hafa eyðilagt kórónu aðalkóngsins síns um aldur og ævi.

Kannski var þetta allt til góðs. Um það er of snemmt að segja. En sigurgleðin leynir sér ekki á andlitum nýja settsins á myndum dagblaðanna í dag. Eins og börn í nýjum regngalla, enda ennþá nóg vatn eftir í glasinu enn. Bæði heitt og kalt. Og út um allan heim.

Ég á mér þá ósk að nýja settinu takist að búa svo um hnútana að auðlind vatnsglassins verði áfram almannaeign en ekki gefin einkaframtaki, jafnvel þó einhver greiðsla komi á móti. Nýstofnuð hlutafélagasamstæða getur skilað ágætum hagnaði fyrir því. Verði hún seld frá hinum almenna Reykvíkingi á ekki að gera það ekki fyrr en eitthvert raunverulegt verð kemur fyrir svo hægt sé að lækka skuldir borgarinnar.

Segir Mosfellingurinn sem kaupir vatn og rafmagn af OR og á líklega ekki annarra kosta völ!

Stormurinn geisar enn í vatnsglasinu. Hann hefur bara gengið til á áttunum.

Athugasemdir

[Hulda Bergrós Stefánsdóttir, 12.10.2007 kl. 21:33]

Vonandi tæmist það ekki !!!!

[Helga Guðrún Eiríksdóttir, 15.10.2007 kl. 01:49]

Seld frá hinum almenna Reykvíkingi? Nú sest hinn almenni Reykvíkingur á sitt eðalrassgat meðan Skagfirðingurinn lemur Mosfellinginn í hausinn með silungi úr Hérðaðsvötnum. Landið er ennþá landið þó komið sé norður fyrir götuljós. Og hananú og habbðuða gamli snillingur!

[Sigurður Hreiðar, 15.10.2007 kl. 09:59]

Er ennþá silungur í Héraðsvötnum? Er ekki búið að selja hann? Ertu viss um að hann sé ekki kominn undir Ormaveitu Reykjavíkur?