Eins og föst flyksa

Stundum er eins og vitleysur fari í gang af sjálfum sér og svo lepur hver upp eftir öðrum. Dæmi: einhver birti mynd sem sýndi ekki alla þá sem hann hefði viljað sýna. Þá setti hann í myndatexta: Á myndina vantar -- N.N. -- Sem er náttúrlega tómt rugl, því á myndinni var allt sem hún hafði að sýna, það vantaði ekkert á hana!

Öðru sinni sagði einhver að eitthvað væri eins og N.N. væri einum lagið -- af því að það var eitthvað sem ekki var á annarra færi en hans. Síðan hangir þetta „einum“ þarna inni eins og föst flyksa. Þó N.N. ætti þetta sameiginlegt með fjölmörgum öðrum kann það samt að vera eitthvað sem er honum líkt -- sem sagt honum lagið þó ekki sé það einsdæmi.

Þriðja sinni slengdi einhver saman tveimur orðtökum, að standa sig og að standa í stykkinu. Síðan þykir góð latína að standa sig í stykkinu. Þetta er eins og að nota bæði belti og axlabönd.

Fjórða má við bæta í þessu stagli um fasta frasa. Það er þegar talað er um gengi krónunnar í seinni fréttum sjónvarps og vísitala hefur hækkað eða lækkað eftir efnum og ástæðum. Þá er ævinlega sagt „og veiktist/styrktist gengi krónunnar sem því nemur.“ -- Hvernig væri að hafa þetta kannski svona á mánudögum? Á þriðjudögum „að sama skapi,“ á miðvikudögum „í samræmi við það,“ á fimmtudögum „eftir því“?

Og ugglaust mætti láta sér detta eitthvað fleira í hug.

Athugasemdir

[Helga R. Einarsdóttir, 30.7.2007 kl. 21:08]

"Samkvæmt því", sitjum við sitt hvoru megin heiðar og höfum ekkert þarfara fyrir stafni en að skrifa um eitthvað sem skiptir engu máli. Eða er það annars? Auðvitað skiptir það máli hvað okkur finnst aða finnst ekki. "Og maður á alltaf að segja það sem manni finnst". Það finnst mér og haga mér "sem því nemur"? - Nei - gengur ekki.

[Sigurður Hreiðar, 30.7.2007 kl. 21:18]

„Samkvæmt því“ er ég að þessu bloggbulli af því ég nenni ekki að gera neitt af viti -- hérna megin heiðar. Hins vegar er ég þeirrar skoðunar að maður eigi ekki alltaf að segja það sem manni finnst -- en aldrei að segja annað en manni finnst. -- Stundum er langbest að þegja -- fast.

[Helga R. Einarsdóttir, 30.7.2007 kl. 22:04]

Ég gleymdi þeirri gullnu regl, en er þér alveg sammál. kv.

[Sigurður Þórðarson (IP-tala skráð) 1.8.2007 kl. 09:19]

Er þér ekki einum lagið að standa þig í stykkinu?

Nafni