Gisting í sparifötum

Eins og vanalega nærist maður á Mogganum samhliða morgunkorninu. Fróðlegt í dag að sjá úttekt á því hvað kostar að fara hringveginn og gista, gaman að sjá hvernig uppsettu ferðafólki greinarhöfundar vex hægt og bítandi fiskur um fjárhagslegan hrygg frá því að gutla ferðina á Fiestu og hírast í tjaldi, upp í að þeysast á Range Rover og gista í spariklæddum rúmum í sérherbergjum bændagistinga.

Reyndar verður að segjast greinarhöfundi til hróss að í greininni sjálfri eru rúmin bara uppbúin. Það er í texta töflunnar sem þau verða upp-á-búin. En á því er reginmunur. Uppábúinn er að vera spariklæddur.

Ég sé gjarnan fyrir mér þessi upp-á-búnu rúm öll í pelli og purpura, líkt og teiknimynd í ævintýrum sosum eins og því um prinsessuna á bauninni. Og -- sjálfsagt er hægt að sparibúa alla skapaða hluti, líka rúm.