Hélt einhver að parkett væri bara parkett?

Ég fór að skoða parkett í dag. Það eru dálítið merkileg vísindi. Ég hafði heyrt um viðarparkett og plastparkett og línóleumparkett (er annars ekkert íslenskt orð til fyrir parkett?), fyrir utan parkett kennt við tilteknar viðartegundir og sköpulag kubbanna eða kubbanna sem í það er raðað. Að öðru leyti virðist þetta í grundvallaratriðum vera gegnheilt parkett eða smelluparkett.

Sumir sölumenn segja að enginn noti gegnheilt parkett lengur af því það þarf að slípa og lakka þegar loks er búið að puða við að leggja það á sinn stað. Aðrir sölumenn segja að það sé eina alvöru parkettið. Í dag rann hins vegar upp fyrir mér að það þarf svo sem ekkert viðarkyns að koma nálægt parketti – þó það líti út eins og gólf úr fjölum eða kubbum. Í mörgum tilvikum er þetta bara eins konar ljósmynd af viði sem er límd ofan á þar til gert undirlag, sem er mismunandi eftir því hvaðan varan kemur, en síðan kemur einhvers konar slitfilma þar ofan á. Sem þolir 20 barnabarna ærsl í 20 ár – eða þannig. 

Svona parkett getur heitið harðparkett eða pergóparkett en má að sögn sölumanna alls ekki rugla saman við plastparkett sem samt lítur nokkurn veginn eins út, sama úr hvaða sjónarhorni það er skoðað.  

Annars þótti mér fróðlegt að hlusta á sölumennina sem allir eru vissir um að þeirra vara taki annarri fram. Einn hafði tam. ákaflega beitta aðferð til að koma því á framfæri. Hann hafði nefnilega nýlega selt tengdamömmu einmitt svona parkett og hún réði sér ekki fyrir fögnuði. Pabbi og mamma höfðu nákvæmlega þetta á stofunni hjá sér og höfðu ekki í löndum hjúskap sínum haft jafn góð efni á gólfunum. Afi fékk sér svona flísar fyrir ári og gott ef hann gekk ekki í endurnýjum lífdaga. Því miður varð ég fyrir einhverri truflun þegar hér var komið sögu þannig að ég veit ekki hvernig systkinin eða aðrir lengra sóttir í ættboganum hafa á gólfunum hjá sér.  Ég veit bara að það tekur öllu öðru fram sem hægt er að hafa á gólfum.  

Eftir þessa dembu erum við að hafa okkar gamla góða og græna Álafoss-gólfteppis áfram á stofunni í önnur 30 ár. Þá gerist tvennt: a: við verðum löngu hætt að þurfa að hugsa um jarðnesk gólfefni b: þá verður komin einhver rosafín filma sem er bara sprautað yfir gólfið í eitt skipti fyrir öll og svo velur maður með stjórnborði (eða bara frá hússtjórnartölvunni) hvaða áferð, lit og blæ maður vill hafa á því á hverjum tíma.  

Athugasemdir

[Jón Steinar Ragnarsson, 20.7.2007 kl. 05:03]

Jamm...ég hef lent í sölumönnum, sem áttu að minnsta kosti tvö eintök af öllu, sem ég spurði um og ættleggur þeirra allur einnig og allt var þetta náttúrlega allt annað og betra líf hjá þessu fólki eftir þessi viturlegu kaup.

Mundi pæla í þessari filmu, sem breytir um áferð og lit. Ekki vitlaus hugmynd og vafalaust framkvæmanleg.  Ættir að takka patent á þessu.

[Ásgeir Kristinn Lárusson, 20.7.2007 kl. 12:08]

...eða hafa parkettið eins báðum megin, þannig að eftir 20 ár snýrðu því bara við og þá geta barnabarnabörnin ærslast í önnur 20 ár!

[Elín Erlingsdóttir (IP-tala skráð) 20.7.2007 kl. 14:30]

Kvitta fyrir innkomu enda viss um að ég taldi mig talda með í "fullt af frændum og frænkum" upptalningunni.

Elín Erlings.

[Sigurður Viktor Úlfarsson, 20.7.2007 kl. 21:37]

Ég er svosem ekki sérfræðingur en við keyptum okkur parkett á gólfið í vetur.  "Alvöru" parkett varð sífellt minna spennandi eftir því sem við skoðuðum meira, alveg eins og náttúrulegar flísar.  Þau kalla á alls kyns viðhald og það að borið sé á með reglulegu millibili...sem þýðir að maður ber ekkert á þetta fyrr en nokkrum mánuðum eftir að maður ætti að vera búinn að bera á þetta og það þýðir að nokkra mánuði á ári er þetta hálf ljótt og sjúskað.

Það sem við gerðum var að við sóttum hugvit, undirlag, lista o.þ.h. í fagverslun (Harðviðarval) en keyptum hins vegar parkettið sjálft í Ikea (en starfsfólkið þar vissi ekki nokkurn skapaðan hlut).  Það er ekki plastparkett en eitthvað álíka efni með 15 ára ábyrgð.  Verður alltaf eins og við, börn og barnabörn geta vaðið yfir það á skítugum skónum endalaust.

Annað, fólkið í búðunum og "parketfræðin" segja að maður eigi að leggja parkettið langsöm frá glugga en ekki þversöm.  Arkitekt sem ég ræddi við sagði hins vegar að þetta væri liðin tíð.  Í dag leggðust borðin alveg saman og því mynduðust engir skuggar milli borðanna.  Arkitektinn sagði einfaldlega að ef maður vildi breikka rýmið þá leggði maður þversöm en ef maður vildi lengja rýmið þá leggði maður langsöm.

[Sigurður Hreiðar, 20.7.2007 kl. 23:37]

Bestu þakkir fyrir viðbrögð og góð ráð -- eins og allir vita er gott að fá svo mörg ráð að maður geti virt megnið af þeim að vettugi. - En, Ásgeir Kristinn - ég ætla að huga að þessu með einkaleyfið.

Og Sigurður Viktor -- þetta með að leggja langs eða þvers -- mér finnst það eiga að fara nokkuð eftir því hvernig maður kemur inn í rýmið og hvort það er þá á langveginn eða þverveginn. Sem kemur heim við það sem þú segir, lögnin getur breikkað eða mjókkað rýmið eftir því hvernig hún snýr.

Og - Elín Erlings - mig grunar að þú heitir Sigrún að millinafni og sért örugglega í frændgarði mínum nokkuð nánum! Takk fyrir að gera vart við þig.

Góð kveðja til ykkar allra.