Wonderful Ways of Computers

„Ég er nú búinn að vera leigubílstjóri í 25 ár“, er viðkvæði hjá ágætri Spaugstofutýpu -- sama gæti ég sagt, ég held að það séu núna 22 ár síðan ég byrjaði að nota tölvu sem vinnutæki í ritvinnslu.

En lengi skal tölvuna reyna. „Wonderful Ways of Computers,“ er viðkvæðið hjá einum vina minna þegar hann þarf að klóra sér í hausnum út af einhverjum tiktúrum tölvunnar. Svo bætir hann gjarnan við: „Have you tried to kick it?“

Í morgun byrjaði ég á að kaupa stærra myndarými inni í blogginu og borgaði fyrir það 999 krónur. Við það varð fjandinn laus.

Ég skrifaði innblásið blogg um fegurð sunnudagsins (í gær) og byrjaði að setja inn í það myndir. Sem ég var að hagræða myndunum hvarf þetta allt, en ég var áfram innskráður í bloggið svo ég bara ræskti mig og skrifaði blessaðan pistilinn aftur, svona sirka bát eftir minni, og ætlaði svo að setja inn í hann myndir.

Þá varð allt fast. Ekkert gerðist, hvernig og hvar sem ég potaði. Og þeir sem þekkja mig vita að ég er ýtinn.

Það endaði með að netið skaut mér út og sagði „error“, sem er tölvumál þegar hún veit ekki hvað hún á annað að segja. En ég fór inn aftur og inn í bloggið og viti menn: pistillinn var kominn þar, en myndalaus. Myndirnar eru textalausar í eindálksræfli vinstra megin.

Ég gaf mér ekki tíma til að aðhafast frekar, en næst þegar ég ætlaði að skoða þetta komst ég ekki inn. Ekki í mitt blogg, ekki heldur í önnur blogg á blog.is sem ég vildi skoða. Afturámóti digurbarkalega skipum um að hafa samband við Mr. Webmaster hjá mbl.is og játa á mig syndir mínar, hvað ég hefði eiginlega gert til að verðskulda þessi ósköp.

Hvað ég að sjálfsögðu gerði og baðst auðmjúklega afsökunar á að hafa keypt stærra myndapláss.

Og viti menn -- hér er ég kominn aftur -- á fulla ferð -- og hér með farinn út aftur í góða veðrið.

Wonderful Ways of Computers.