Að gerast bloggur

4.7.2007 | 10:41

Nú er hálfur mánuður síðan ég gerðist bloggur – hmm – er þetta nafnorð eða lýsingarorð? Sé það nafnorð um þann sem bloggar og beygist eins og goggur – já, það er svosem ágætt, og þannig hugsaði ég það. En sé reyndar núna þegar ég skrifaði það að það gæti allt eins verið lýsingarorð og beygst eins og glöggur. Hlýtur þá að eiga við þann sem sinnir vel sínu bloggi og er – ja – bloggvís?

Taka tvö: Nú er hálfur mánuður síðan ég byrjaði að blogga. Sjálfum mér til skemmtunar, svo mikið er víst, og ég hef haft nokkurt gaman af því. En sá sem skrifar vill að ritverk hans sé lesið og veki viðbrögð. Miðað við skrá yfir heimsóknir hafa jú einhverjir gluggað inn til mín, en aðeins vinir og vandamenn hafa sýnt einhver viðbrögð. Tveir gamlir samstarfsmenn og svo hún frænka mín sem ég hef stundum kallað nr. 1. Ég vona að ég móðgi ekkert annað frændfólk með því, enda var hún fyrst í myndarlegri röð systrabarna minna.

Og nú er hún orðin nr. 1 í bloggvinaröðinni. Þar var hún brautryðjandinn. (Fyrirgefðu, Gurrí mín!)

Ég vildi ég gæti sagt söguna af því þear nr. 1 fæddist, því það gerðist á heimili foreldra minna (og þar með mínu). En ég rugla þeim atburði mjög saman við fæðingu nr. 2 sem gerðist rúmlega ári seinna og mér þótti að því leyti merkari atburður að hann gerðist á afmælisdaginn minn það árið.

Aldursmunur á mér og þessum frændbörnum mínum er ekki mikill og mér þótti jafnan fengur að því að hafa þau í heimsókn, ekki síst þegar þau fóru að stálpast. Þá gerðist oft eitt og annað sem gaman var að. Lítið dæmi var einhverju sinni er 1 og 2 fóru með mér að kvöldi að sækja kýrnar að nr. tvö sleit upp tág og vingsaði henni í kringum sig svo hvein í. Þá fór í hönd samtal á þessa leið.

Sigurður: Hættessu.

Nr. 2: Akkuru?

Sigurður (fúsk theol., vegna skorts á betri rökum): Vegna þess að þú lemur frá þér Guð og góðu englana.

Nr. 2: Guð og góðu englana? Hvar eru þeir? Ég séðá ekki.

Sigurður (fúsk. theol.): Nei, þú sérðá ekki, en þeir eru allt í kringumðig.

Nr. 2 (hættir fleygir táginni, hugsar sig um og lætur sig falla): Ahh, nú datt ég á Guð…

Sögu lokið.

En aftur að bloggreynslu minni: Ætli ég þrauki ekki eitthvað lengur. Að minnsta kosti meðan ég hef gaman af því sjálfur.

Bloggi lokið.

Flokkur: Dægurmál | Facebook