Sumarhús í náttúruperlu

Fasteignaauglýsingar eru oft áhugaverðar. Til dæmis til að sjá hvernig fasteignaverð rýkur upp án nokkurs samhengis við annað verðlag í landinu. Einnig til að fylgjast með oft furðulegu orðalagi í þessum blessuðum auglýsingum og undarlegum málskilningi þeirra sem að þeim standa.

Hvað þýðir til dæmis að íbúð sé „fokheld að innan“? Ef húsið er fokhelt að öðru leyti, er þá von á stórviðri að innanverðu ? Eða, er „einbýlishús með aukaíbúð“ ekki augljóslega tvíbýlishús?

Verra er þó ef alvarleg misprentun verður í texta fasteignaauglýsingar. Á fasteignavef mbl.is í dag rakst ég á þessa mynd og af því ég kannast við kofann skoðaði ég þetta nánar. Húsinu er þar lýst sem „sumarhús[i] í stórkostlegri náttúruperlu rétt ofan við Reykjavík“. Svo kemur nánari lýsing og endar á:  „Byggingarár: 1998“.

Þetta hlýtur að vera prentvilla. Á líklega að vera 1958, eða kannski 1948. Því árið 1962 var ég að bera víurnar í þetta hús. Þá var pýramídaþak á útskotinu lengst til hægri á myndinni og því kölluðu nágrannarnir þetta hús Kardimommubæinn. Eigandinn var leigubílstjóri í Reykjavík, mig minnir að hann hafi átt heima á Laugaveginum en man ekki lengur hvað hann hét. En hann hafði þá byggt slotið fyrir nokkrum árum.

Raunar hefur verið bætt við það síðan, m.a. álmunni sem er eins og að hefja sig til flugs aftur úr slotinu. Kann að vera að það hafi verið gert 1998? En varla dugar það til að gefa öllu slotinu það virðulega byggingarár.

Til að ljúka sögunni varð ekki úr kaupunum á sínum tíma. M.a. vegna árinnar sem fram hjá því rennur og á sinn þátt í náttúruperlunni. Svo sakleysisleg sem sprænan er flesta daga ársins getur hlaupið í hana verulegur vöxtur í leysinum og á þessum árum var ekki komin svo góð brú á hana sem nú er orðið.

En mér hefur alltaf verið vel við Kardimommubæinn síðan -- jafnvel þó hann hafi tekið ofan píramídann!

Athugasemdir

[Helga R. Einarsdóttir, 1.7.2007 kl. 22:11]

Má ég vita hvar húsið stendur? kv.

[Sigurður Hreiðar, 1.7.2007 kl. 22:15]

Hvort´ú mátt, minn einkabloggvinur!

[Sigurður Hreiðar, 1.7.2007 kl. 22:19]

Hvort´ú mátt, minn einkabloggvinur!

(þetta hleypur frá manni áður en maður ætlar að láta það fara. Fyrr má nú vera óðagotið.

Þegar þú kemur ofan Lækjarbotnabrekkuna á leið að austan sérðu fljótlega Elliðakotsbæinn á hægri hönd (áður en þú kemur að Gunnarshólma) -- myndarlegan bæ og mikið af vinnuvélum kringum hann. Strax vestan við hann er þyrping sumarbústaða -- þessi bústaður heitir brú og stendur fremstur, alveg við brúna. Raunar mjög áberandi frá Suðurlandsvegi.

Svo heldurðu bara áfram og droppar inn í Mosó -- á gamla staðnum.

Góð kveðja

SHH

[Helga R. Einarsdóttir, 2.7.2007 kl. 08:56]

Takk fyrir leiðbeiningar og gott boð. kv.