Ekki hrossasjampó

Á dögunum keypti ég hársápu (oftast kallaða sjampó) þrátt fyrir að vera fremur þunnhærður og snögghærður. Dóttir mín segir samt (eða sagði) að ég sé bara talsvert loðinn í skallanum.

Ég hrifsaði dollu af þessu efni niður úr búðarhillu og fór ekki að skoða hana fyrr en ég kom heim. Þá sá ég að á hálsi hennar stendur að efnið í henni sé „Fyrir menn“!

Mikið varð ég glaður, að ég skyldi ekki hafa álpast til að kaupa mér hrossasjampó.

Ef framleiðandinn/seljandinn hefði fengið íslenskumælandi mann (kven-mann eða karl-mann) sér til aðstoðar hefði líklega staðið þarna: „Handa körlum“.

Við nánari lestur kom í ljós að þarna stendur líka: „Fyrir kláða í hársverði“. Ef íslenskumælandi maður hefði verið fenginn líka til að þýða þessa línu hefði sennilega staðið „Gegn kláða í hársverði“.

Ekki veit ég hver innflytjandi og seljandi þessarar ágætu vöru er á Íslandi. En hann ber ekki mikla virðingu fyrir tungumálinu. Gæti svo sem vel verið að hann sé heldur ekki Íslendingur og þá er skömm hans kannski ekki alveg eins mikil.

Mér finnst hneisa að innflytjendur/seljendur vöru, sem á annað borð leggja sig eftir því að íslenska það sem á henni stendur, að hluta eða fullu, skuli ekki skammast til að gera það sómasamlega.

En þar fyrir utan er þetta skolli gott efni. Hárið (svo langt sem það nær) verður skemmtilega mjúkt og þjált af notkun þess.