Lést á Kvíabryggju

Sennilega á maður eftir að sitja í tugthúsi nokkur ár. Það væri skemmtilegur endir á æviferlinum. Lést á Kvíabryggju, verður sennilega sagt í dánartilkynningunni.

Og ég sem hélt að það væri skortur á tugthúsplássi á landinu. 

En nú á að fara að dæma mann í tugthús ef maður skilar ekki þeim afgangi sem maður hugsanlega á í lok utanferðar. Ekki nóg með að yfirfærslan sé skömmtuð sem skítur úr hnefa áður en maður leggur af stað; sennilega verða settir upp sérstakir skannar á komustöðum til landsins til að gá hve margar evrur eða danskar krónur maður hefur ekki notað í þetta skiptið.

Ég haf venjulega komið með einhvern afgangs gjaldeyri eftir mínar utanreisur. Og geymt þær til síðari nota við þær aðstæður sem þær henta. Rétt eins og klippimiða fyrir strætó sem ég get svo notað afganginn af næst þegar ég kem þangað.

Ég verð að segja að mér finnst þetta fáránleg tillaga og hugsa að ég sé ekki sá eini sem muni hunsa þessi lög algjörlega ef þau verða að lögum, eða stofna mér bankareikninga ytra þar sem ég kem oftast (kominn á þann aldur að nenna ekki að vera alltaf að skoða nýja staði). Eða stinga þeim í umslag og senda einhverjum vini mínum í útlöndum í pósti honum til hagnýtingar eða geymslu fyrir mig eftir því sem við á.

Og svo er náttúrlega sjálfgert að hætta allri ferðalagavitleysu þegar maður verður kominn á Kvíabryggju, því sennilega fæst ekki ferðaleyfi þaðan til útlanda.

Er ekki annars ágætt að vera á Kvíabryggju? Góður matur -- og góðar dýnur í rúmunum?

Athugasemdir

[Ásthildur Cesil Þórðardóttir, 9.6.2011 kl. 09:53]

Það sem mér fannst einkennilegt í málflutningi Geirs, af hverju var hann svona viss um að fá að fara á Kvíabryggju, er það af því að sá staður er fyrir hvítflibba?  Ekki var um neitt að ræða fyrir minn son en Litla Hraun nema ég tróð honum inn í Kópavoginum með frekju.

[Sigurður Hreiðar, 9.6.2011 kl. 10:55]

Sæl Ásthildur, ég man ekki eftir innliti frá þér fyrr, velkomin. -- Ég hef einhvern veginn staðið í þeirri meiningu já, að Kvíabryggja væri fyrir hvítflibba og þá sem væru dæmir fyrir einhver fjármálasvik. Annars er ég ókunnugur fangelsismálum og vissi ekki einu sinni um fangelsi í Kópavogi -- nema eitt sem ég hélt að væri aðeins fyrir konur. -- Ég reikna með að vera helst sendur á Kvíabryggju þegar upp kemst að ég hef ekki arkað í banka með 15 evrurnar sem ég átti eftir fyrir utanferðina á dögunum.

[Vilhjálmur Stefánsson, 9.6.2011 kl. 17:12]

Sigurður......þeir segja að lúxusinn sé í tugthúsinu á Akureyri.....

[Sigurður Hreiðar, 9.6.2011 kl. 18:25]

Takk Vilhjálmur. Alltaf gott að vita hvert maður á að stefna. Þ.e.a.s. þegar ég verð gripinn með evrurnar 15 í vasanum.