Græðgisvæðing

Ég fæ stundum ónot fyrir bringspalirnar af auglýsingum þar sem þetta eða hitt kostar X-mörg þúsund og 999 krónur. Jafnvel þó það séu ekki nema 990 krónur. Mér finnst þess háttar verðlagning gera lítið úr viðskiptavininum, að hann láti glepjast af því að það vantar eina eða tíu krónur upp á næsta þúsund. Ef ég sé eitthvað auglýst á 2.990 krónur les ég það sjálfkrafa sem 3000 krónur, ekki sem 2000 krónur eins og mér virðist að auglýsandinn ætlist til að við fíflin viðskiptavinirnir lesum það. -- Og sneiði heldur hjá þeim sem auglýsa með svo mikilli lítilsvirðingu við viðskiptamenn sína.

Annað: Ég held að æði margir megi passa sig að verðleggja sig ekki út af markaðnum. Kom á dögunum við í gamla verkstæðinu neðan vegar móti Þorvaldseyri undir Eyjafjöllum, þar sem Óli á Eyri er búinn að koma upp minjasafni um gosið í Eyjafjallajökli, selur þar minjagripi og heimatilbúið kornmeti og sýnir bíó um gosið. Það er í sjálfu sér ágætis bíó og vel gerð mynd, þökk sé Sveini M. Sveinssyni. En að taka 800 krónur á mann fyrir tíu mínútna bíó eða þar um bil kalla ég að prísa sig út af markaðnum. Miði á alvöru bíó, 90 mínútna mynd, skilst mér að almennt kosti nú 1200 krónur eða þar um bil, svo Bíó Þorvaldseyri er alveg rándýrt. 250 eða í hæsta lagi 300 krónur væri enn dýrt en þó viðunandi. -- Svo kemur maður út af gamla verkstæðinu og þá sér maður heimabíla fyrir hátt í 20 milljónir á hlaðinu!!!

Við stöldruðum líka aðeins við á bændamarkaðnum á Hvolsvelli. Sá nú ekki margt þar í svipsýn sem heillaði mig, en innst inni í horni er haugur af gömlum bókum sem flestar hafa verið lesnar ofan í kjölinn. Svoddan bækur kosta í Góða hirðinum til dæmis 50 til 200 krónur, eða gerðu síðast þegar ég kom þar. En ekki á bændamarkaðnum á Hvolsvelli. Þar er ekki skilið milli bókverka eftir stærð eða merkilegheitum, þar kostar hver skrudda 650 krónur. -- Það er ekki von að stabbinn minnki.

Passið ykkur! Almenningur er ekki enn búinn að gleyma orðinu „græðgisvæðing“.

Athugasemdir

[Vilhjálmur Stefánsson, 4.5.2011 kl. 23:48]

Bændamarkaðurinn á Hvolsvelli stendur ekki undir nafni,þar eru rándýrar kjötvörur frá Sláturfélagi Suðurlands sem er þekt fyrir ofsaltaðar vörur.   

[Sigurður Hreiðar, 5.5.2011 kl. 10:00]

Ofsaltaðar? Er það ekki gegnumgangandi fyrir framleiðendur unnar kjötvöru? Og vatnsfylltar. Mér hefur ekki þótt SS skara fram úr (les: verri en aðrir) í þessum efnum, nema síður sé. En við hraðskoðun mína sýndist mér bændamarkaðurinn vera ýmislegt fremur en bændamarkaður. Og man heldur ekki að hann væri merktur sem slíkur. Þarna stóð stórum stöfum Farmers Market, ef ég man rétt. Þá er hún Snorrabúð stekkur ef Rangæingar hafa gleymt máli forfeðranna.

[Helga Sigurdardottir (IP-tala skráð) 5.5.2011 kl. 20:49]

Ég ætla ekki að segja þér hvað hlutirnir kosta í Noregi... 800 króna bíósýning væri næstum gefins, þó að hún væri bara 10 mínútur. Hér gildir eiginlega bara að líta ekki á verðmiðann, loka bara augunum og rétta fram kortið... það getur hjálpað að humma líka í leiðinni til að banda burt hvers kyns verðsamanburðarhugsunum...

[Sigurður Hreiðar, 6.5.2011 kl. 12:53]

Já, Helga, maður heyrir af þessu látið.

Heima er best.

Kveðja í bæinn.

[Guðjón Sigþór Jensson, 8.5.2011 kl. 08:18]

Þessa heimildamynd um Eyjafjallagosið mætti fjölfalda og selja í bílförmum ef verðið væri sanngjarnt, t.d. 8-12 Evrur. Reynsla mín af þjónustumiðstöðinni í Skaftafeli þar sem ferðafólki er boðið að sjá heimildamynd um eldgosið 1996 er sú, að margir hafa komið að máli við mig og þráspyrja mig hvar unnt væri að fá þessa heimildamynd keypta. Þetta góða fólk vill gjarnan sýna ættingjum og vinafólki það sem það upplifði: eg sá þessa mynd og fór um þessa stórbrotnu fjölbreyttu nátturu.

Af þessu tilefni kannaði eg málið í ljós kom fram eitthvað svo mjög íslenskt: rétthafar sem eru einhverjir tugir, vilja ekki ljá máls á þessu nema fá sinn skerf. Sem sagt: allir vonast til að fá miljónir fyrir skerf sinn. Auðvitað ber að virða höfundarrétt en í stað þess að fá einhverjar tekjur hefur enginn neitt. Sjónvarpið gæti auk þess aukið tekjur sínar með þessu sem ekki veitir af. Sé verð á þessum myndum sanngjarnt, mætti selja í bílförmum yfir ferðamannatímann eins og fram hefur komið.

Það er mjög miður að ekki sé unnt að koma á reglulegum ferðamannaiðnaði, þ.e. framleiðslu í þágu ferðaþjónustu. Heimildamyndir um náttúru landsins eru einar mikilvægustu vörur sem unnt væri að selja sem minjagripi auk þess varnings sem seldar eru í ferðamannaverslunu m eins og á Álafossi, í Víkurprjóni og fleirum prýðisgóðum verslunum. Því miður er sitthvað eins og uppstoppuð dýr á borð við lunda frsamleidd í Asíu. Það gætum við sjálfir framleitt enda jaðrar við hneyksli að minjagripir sem eiga að tengjast Íslandi séu merktir: Made in China eða einhvers staðar annars staðar.

Góðar stundir

GJ

[Sigurður Hreiðar, 8.5.2011 kl. 12:00]

Þessa mynd sem þú nefnir Guðjón og sjá má í Skaftafelli hef ég aldrei séð. Hvað ætli kosti að sjá hana og hversu löng er hún í mínútum, svona uþb?

-- Í lok myndarinnar sem sýnd er í gamla verkstæðishúsinu undir Fjöllunum er sagt að hægt sé að kaupa hana á DVD í afgreiðslunni. Fólk sem með mér var hafði einmitt hug á að kaupa þannig eintak, helst á þýsku, handa þýskum vinum. Þá kom í ljós að diskurinn var ekki kominn í sölu svo verðið varð aldrei upplýst. En mér þætti þannig diskur með 10 mínútna skorpu varla mega fara yfir 8 evrurnar. Var um daginn í San Sebastian de la Gomera að skoða kynningardisk DVD um La Gomera, 25 mín. diskur átti að kosta 4 evrur. Það blöskraði mér ekki en lét þó ókeyptan í það skiptið.

[Guðjón Sigþór Jensson, 10.5.2011 kl. 13:21]

Upphaflega myndin er 30 mínútur en styttri gerð um 12 mín ef eg man rétt. Sú gerð er látin „rúlla“ allan daginn í sal þar sem um 35 manns geta séð hana í einu. Ekkert er tekið fyrir að skoða en alltaf kemur fólk til mín og spyr mig hvar unnt sé að kaupa eintak.

Þessi mynd er vel lukkuð, þar leikur Magnús Tumi aðalhlutverkið og útskýrir mjög vel jarðeðlisfræðina hvað þarna var að gerast. Mjög mögnuð tónlist trekkir áhrifin þegar jakarnir skella á mannvirkjum og eyðileggja. Ferðamennirnir eru mjög hrifnir af þessu framtaki, hvernig Íslendingar réðust strax í framkvæmdir að byggja upp að nýju.

Mér finnst leiðsögn um þessar slóðir koma mjög vel til skila enda skynja ferðamennirnir mjög vel þessa nálægð við náttúruöflin.

Líklegt þykir mér að unnt sé að fá að skoða þessa heimild hjá RÚV þannig að ekki þarf að leggja á sig langt ferðalag austur í Skaftafell.

Varðandi erlent fræðsluefni þá keypti eg fyrir langt löngu CD disk um náttúru í eldfjallinu Calera de la Tabuierente á La Palma. Mér fannst mikið til hans koma og horfði margsinnis á og naut tónlistarinnar. Ef eg finn hann í gömlu dóti þá er þér með boðið að skoða!

Kv.

GJ