Orðað af ítrasta harðlífi

„Karlmaður fannst látinn í gufuklefa World Class í Laugum í vikunni. Skv. upplýsingum frá lögreglu var um skyndidauða að ræða. Enginn grunur leikur á að andlátið hafi borið að með saknæmum hætti.“

Svona hefst frétt í mbl.is sem uppi er þessa stundina. 

Satt að segja finnst mér þetta orðað af ítrasta harðlífi. Skyndidauði er svona síðari tíma lapparísorð eins og samnemandi. Menn eru að reyna að bjarga sér af því þeir kunna ekki að tala. Eðlilegt hefði verið að segja hér: „Lögreglan telur að hann hafi orðið bráðkvaddur.“

Þá erum við líka laus við þetta „um að ræða“-stagl.

Athugasemdir

[Jón Steinar Ragnarsson, 5.3.2011 kl. 17:38]

Kvitta undir þetta. Ég væri frekar sáttur við að þeir kölluðu skyndibita "bráðabita". Menn geta svo sett "...að verið sé að tala um.." í stað "um að ræða" til að sjá hversu hallærislegt þetta er.

[Eiður Svanberg Guðnason, 5.3.2011 kl. 20:01]

Gott.

[Hrólfur Þ Hraundal, 6.3.2011 kl. 00:15]

Takk !  Sigurður Heiðar, Þörf ábending.  En skyndidauði var þarna mun heppilegri vegna þess að þá var hægt að tala um saknæmi.  Segðu svo að þessir kjánar séu kjánar.

[Sigurður Hreiðar, 6.3.2011 kl. 11:59]

Takk fyrir innlitið, allir. En Hrólfur, ég sé ekkert frekar saknæmt við deyja skyndilega heldur en verða bráðkvaddur. Mér finnst enn að kjánar séu kjánar.

[Ruth Fjeldsted (IP-tala skráð) 7.3.2011 kl. 11:08]

En hvað finnst þér / ykkur um þetta?:

Af Vísir.is:

„Hugsanlega þarf að farga flugvélinni"

[Sigurður Hreiðar, 7.3.2011 kl. 17:13]

Ja -- fyrst spurt er, Ruth -- finnst mér eðlilegt að ræksninu af þessari flugvél verði fargað. Í minni málvitund hefur sögnin að farga svipaða merkingu og að láta e-ð af hendi, afsala sér því. Ég fargaði gömlu skónum mínum þegar þeir voru ónýtir. Ég fargaði gamla bílnum mínum (gæti þess vegna hafa selt hann). Orðabókin gefur nokkrar merkingar, láta e-ð af hendi, selja (farga jörð), sóa, drepa. -- Mér sýnist þessi flugvél hafa orðið sjálfdauð og því óhætt að farga henni.

Góð kveðja

[Ruth Fjeldsted (IP-tala skráð) 7.3.2011 kl. 17:54]

Í huga gamallar sveitastelpu á þetta hugtak við um skepnur sem ekki voru lengur vænlegar til arðsemi, þá voru þær leiddar í sláturhús og fargað.

Ég fargaði hryssu á hausti sem leið,
hún var hnarreist og gljáandi skjótt;
ég hafði átt fjölmarga ferlega reið,
á þeim farkosti er dimmdi af nótt;
ég vissi engan betri né blíðari vin
eða brjóst með svo óskeikult þor;
ég elskaði Skjónu og allt hennar kyn,
sem í afdölum fellur úr hor. 

sagði Kristján heitinn Eldjárn...

[Sigurður Hreiðar, 7.3.2011 kl. 19:53]

Þetta er nú ekki bara bundið við arðsemina, Ruth, en -- ef svo væri á það ágætlega vel við um ónýta flugvél…